گۆرێ مارگرێت جۆرج ل گوندێ دوورێ هاته نووژەنکرن
ئەڤرۆ نیوز ، زنار تۆڤى:
د رێوره‌سمه‌كێ ژ هه‌ژى دا و ب به‌رهه‌ڤبوونا سكرتاریه‌تا ئێكه‌تیا ئافره‌تێن كوردستانێ و هه‌موو ده‌زگه‌هێن حزبى و حكومى و هژماره‌كا مه‌زن یا خه‌لكێ ده‌ڤه‌رێ ژ موسولمان و مه‌سیحیان ل ناحیا كانى ماسێ ل 26/6/2018 گۆرێ شه‌هیدا ژن مارگرێت جۆرج ل گوندێ دوورێ هاته ڤه‌كرن و چه‌ندین تاجه گولینه ل سه‌ر گۆرێ وێ هاتنه دانان و دیسان چه‌ندین په‌یڤ ژ لایێ لیژنا ناڤچا كانى ماسێ و سكرتاریه‌تا ئێكه‌تیا ئافره‌تێن كوردستانێ و خێزانا مارگرێتێ ڤه هاتنه خواندن، هه‌روه‌سا لیژنا ناڤچه‌یا كانى ماسێ دا دیاركرن:”دێ بزاڤێ كه‌ین كو په‌یكه‌ره‌ك و جاده‌ك بناڤێ مارگرێت جۆرك ل ناحیا كانى ماسێ بهێنه دانان”.
د.ڤیان سلێمان سكرتێرا ئێكه‌تیا ئافره‌تێن كوردستانێ گوت: ده‌ڤه‌را كانى ماسێ لاندكا هه‌ردو شۆره‌شێن ئیلۆن و گولانێ بوویه و ژنا كورد هه‌ر كه‌ڤندا ماموستا و رێ نیشانده‌را ژیانێ بوویه ل كوردستانێ و مل ب ملێ زه‌لامى خه‌باتو تێكوشین كریه، هه‌روه‌سا ژنا كورد هه‌رده‌م خودان پێگه‌ه و سه‌نگ بوویه دناڤا جڤاكێ كوردستانێ دا و هه‌ڤپشكا زه‌لامى بوویه د هه‌موو وارێن ژیانێ دا، مارگرێت جۆرج ئێك ژ وان ژنا بوویه كو شه‌یدایا ئازادى و پێكڤه ژیانێ بوویه و وێ شۆره‌شه‌كا جڤاكى و نه‌ته‌وه‌یى به‌رپاكریه و ئه‌و بوویه ئه‌گه‌رێ نه‌مریا ژنا كورد ل كوردستانێ و گوت ژى: چه‌ندین ژنێن بناڤوده‌نگ ل ده‌ڤه‌را به‌بوارى بالا هه‌بووینه و نوكه ژى ئه‌م وه‌كو ئافره‌تێن كوردستانێ بۆ خوه وانه‌یان ژ خه‌بات و قوربانیدا وان وه‌ردگرین و هه‌روه‌سا مارگرێت جۆرج سیمبۆلا ژنا كورده و ده‌نگێ ژنا كورد بوویه د شۆره‌شا ئیلۆنێ دا.
رۆزا جۆرج خوشكا مارگرێتێ بۆ رۆژناما ئه‌ڤرۆ گوت: ئه‌م گه‌له‌ك كه‌یف خۆشین كو ئه‌ڤ رێوره‌سمه بۆ خوشكا مه هاتینه كرن و ئه‌ڤ پووته‌دانه پێ هاتیه‌دان و گۆرێ وه هاتیه ڤه‌كرن و نووژه‌نكرن، دیسا ئه‌م سه‌ربلندین كو مارگرێت وه‌كو ئێكه‌م كچا كورد و كچه‌كا ئاشوورى ل ده‌ڤه‌را به‌روارى بالا چه‌ك هه‌لگرتى و بوویه پێشمه‌رگه ل شۆره‌شا ئیلۆنى و به‌ره‌ڤانى ژ ئاخا كوردستانێ كرى، بۆ مه شانازیه‌كا مه‌زنه كو خوشكا مه د رێیا رزگاریا كوردستانێ دا جانێ خوه كریه قوربان و گوت ژى: ب چێكرنا گۆرێ وێ جاره‌كادى دیرووك و خه‌باتا وێ زڤریڤه و بۆ مه ئه‌ڤ چه‌نده ده‌ستكه‌فته‌كێ مه‌زنه و ئه‌م ژى دێ لدووڤ رێبازا وێ چین و چو جاران رێبازا وێ به‌رناده‌ین، هه‌روه‌سا ده‌ڤه‌را به‌روارى بالا ب ده‌ڤه‌را پێكڤه ژیانێ دهێته نیاسین كو سه‌دان ساله مه‌سولمان و مه‌سیحى پێكڤه دژین.
هه‌لبه‌ستڤان ئه‌دیب چه‌لكى ل سه‌ر گۆرێ مارگرێتێ بۆ ئه‌ڤرۆ دیاركر: من هه‌لبه‌سته‌ك چێكریه ل سه‌ر” پێشمه‌رگا ژن” كو ل ڤان نێزیكان دێ بیته كلیپ و هێته به‌لاڤكرن، هه‌روه‌سا د شۆره‌شێ دا نه بتنێ زه‌لامى رۆلێ خوه تێدا هه‌بوویه‌ن لێ ژنێ ژى رۆله‌كێ باش تێدا هه‌بوویه و نه بتنێ كارێ وێ نان چێكرن و جل شووشتن نه‌بوو، به‌لكو ژنا كورد پشكداریه‌كا كارا د شه‌ران ژى دا هه‌بوویه، هه‌روه‌سا ڤه‌كرنا گۆرێ وێ ل 26/6/2018 رێزگرتنه‌ك بوو بۆ وێ قاره‌مانا ژن و ئه‌ڤ چه‌نده گه‌له‌ك په‌یاما دگه‌هینیت و ئێك ژ وان كو ئه‌ڤه ژنه‌ك بوویه كو خه‌بات كریه و وه‌ك هه‌ڤبوویه وه‌كو مێران و دیسا مارگرێتێ وه‌كو مێران رۆلێ خوه دیتیه و خه‌باتا چه‌كدارى ل شۆره‌شا ئیلۆنێ كریه و هه‌روه‌سا ئه‌ڤ ژنه مه‌سیحى بوویه و ژنه‌ته‌وا ئاشوورى بوویه، ئانكو ئه‌ڤ چه‌نده هندێ دگه‌هینیت كو هه‌موو نه‌ته‌وه و ئایینان پشكدارى د شۆره‌شا ئیلۆنێ دا كریه و جڤاكێ مه یێ كوردستانێ هاتیه نیاسین ب ئێكدو قه‌بوولكرنێ و پێكڤه ژیانێ، ئه‌ڤ په‌یامه هه‌موو د رێزگرتنا ڤێ شه‌هیدا قاره‌مان دا هه‌بووینه و دیسا ئه‌ڤ ئێكه‌م ژنه بوویه پێشمه‌رگه د شۆره‌شا ئیلۆنێ دا و هه‌روه‌سا سه‌رۆك مه‌سعود بارزانى د به‌رگێ سیێ یێ په‌رتووكا خوه دا یا بناڤێ” بارزانى و بزاڤا رزگاریخوازا كوردى”، دا ل به‌رپه‌رێ 43 دا دبێژیت: كچا ئاشوورى مارگرێت جۆرج گه‌هشته شۆره‌شێ و چه‌ك هه‌لگرت و بوویه نموونه بۆ كچێن كوردستانێ”،ئه‌ڤه باشترین گرۆڤه‌یه ل سه‌ر خزمه‌تا ڤێ شه‌هیدا كوردستانێ و ئه‌ڤ نڤێسینا سه‌رۆك بارزانى ل سه‌ر گۆرێ وێ هاتیه نڤێسین.
مارگرێت جۆرج ل 21/1/1942 ل گوندێ دوورێ ل ده‌ڤه‌را به‌روارى بالا ژ دایك بوویه و ل 26/12/1969 شه‌هید بوویه و ل گوندێ دوورێ هاتیه ڤه‌شارتن.
