ب وێنه – هاڤینگه‌ها گه‌لیێ زوره‌گڤان ل ده‌ڤه‌را بارزان
ئه‌ڤرۆنيوز، نه‌وزاد هلۆرى:
هاڤینگه‌ها گه‌لیێ زوره‌گڤان ئێكه ژ هاڤینگه‌هێن ده‌ڤه‌را بارزان كو چه‌ندین دیمه‌نێن سه‌رنجراكێش و جوان هه‌نه، ئه‌ڤ یه‌ك بوویه ئه‌گه‌ر كو هژماره‌كا مه‌زن یا گه‌شتیار و وه‌لاتیان سه‌ردانا وێ بكه‌ن، به‌لێ نه‌بوونا خزمه‌تگوزاریان گه‌شتیار و خه‌لكێ ده‌ڤه‌رێ دلگرانكرینه.
ئاراز هوشیار، گه‌شتیاره‌كێ دهوكێ یه و سه‌ره‌دانا گه‌ليێ زوره‌گڤان كریه بۆ ئه‌ڤرۆ نیوز گۆت: (ب مه‌ره‌ما بوراندنا ده‌مه‌كێ خوه‌ش مه ژ نێزیك سه‌ره‌دانا هاڤینگه‌هێن ده‌ڤه‌را بارزان كریه ب تایبه‌تى گه‌ليێ زوره‌گڤان، سه‌ره‌راى كو جهه‌كێ خوه‌شه و ئارام و دلگیره، به‌لێ نه‌بوونا خزمه‌تگوزاریان و پاقژ رانه‌گرتنا ژینگه‌هێ چو تام و خوه‌شى نه‌هێلاینه تێدا).
رێڤان فاخر، ئێكه ژ خودان مولكێن گه‌ليێ زوره‌گڤان بۆ ئه‌ڤرۆ نیوز گۆت: (گه‌ليێ زوره‌گڤان ب هه‌بوونا دیمه‌نێن سرۆشتى و ئاڤه‌كا جوان و داروبارێن بناڤوده‌نگه و خه‌لكه‌كێ زۆر وه‌كو گه‌شتیار سه‌ره‌دانا وى دكه‌ن ،مه وه‌كو خودان مولكێن ده‌ڤه‌رێ چه‌ند جهه‌كێن گوزارى لێ درۆستكرینه وه‌كو كافیتریا و خارنگه و كه‌پر و جهێن خێزانى و ڤه‌حه‌ویانێ).
زێده‌تر گۆت: (رۆژانه زێده‌ترى 150 ترومبێلێن گه‌شتیارى سه‌ره‌دانا گه‌ليێ زوره‌گڤان دكه‌ن، به‌لێ نه‌بوونا خزمه‌تگوزاریان خه‌لك بێزاركریه، ژبه‌ركو رێیا وێ نه‌یا درۆستكریه و باژێرڤانی رۆلێ خوه نابینیت د پاقژكرنا گه‌لى دا).
