سه‌رۆكێ حوكمه‌تا هه‌رێمێ دخوازیت پاركا گشتى یا دهۆكێ بهێته ب جهئینان
ئه‌ڤرۆ نیوز، حه‌مۆ محه‌مه‌د:
رێڤه‌به‌رێ نه‌خشه‌دانانا ئاڤه‌دانى ل پارێزگه‌ها دهۆكێ بۆ رۆژناما ئه‌ڤرۆ دیار كر، ژ به‌ركو پاركا گشتى یا دهۆكێ، ئێك ژ پڕۆژێن گرنگه بۆ باژێڕێ دهۆكێ، له‌و سه‌رۆكێ حوكمه‌تا هه‌رێما كوردستانێ و پارێزگه‌رێ دهۆكێ ب فه‌ر دبینن ئه‌ڤ پرۆژه زوو بكه‌ڤیته د قووناغێن ب جهئینانێ دا و دبێژیت: مه وه‌كو رێڤه‌به‌ریێن په‌یوه‌ندیدار ده‌ست ب به‌رهه‌ڤكرنا پڕۆژه‌ى كریه و قووناغا ئێكێ كو كۆژاندنا عه‌ردێ پاركێ و قه‌ره‌بووكرنا مه‌لاكایه، د قووناغا دووماهیێ دایه و ل نێزیك ئه‌و وه‌لاتیێن ماف د وى عه‌ردى دا هه‌ى؛ دێ هێنه قه‌ره‌بووكرن.
ئه‌ندازیار كوردۆ ئیحسان، رێڤه‌به‌رێ نه‌خشه‌دانانا ئاڤه‌دانى ل پارێزگه‌ها دهۆكێ ئاشكرا ژى كر، پڕژێ پاركا گشتى یا باژێڕێ دهۆكێ؛ دێ رووبه‌ره‌كێ زۆر یێ كه‌سكاتى ده‌ته دهۆكێ و گۆت: “پاركا گشتى یا دهۆكێ ل سه‌ر رووبه‌رى نێزیكى 300 دۆنه‌مێن عه‌ردى دێ هێته دروستكرن، ل دووڤ ماسته‌رپلانێ و بنه‌مایێن پلانسازیێ یێن زانستى، دیزاین و نه‌خشه‌كێ گه‌له‌ك باش بۆ هاتیه دانان كو د كه‌ڤیته ده‌ڤه‌را ئالۆكا و هه‌رسێ پشكێن پارێزگه‌ها دهۆكێ، وه‌كو ده‌ڤه‌رێن فه‌یدیێ و دومیز، ده‌ڤه‌را سێمێلێ و دهۆكێ پێكڤه گرێ دده‌ت و دكه‌ڤیته سیچگۆشه‌یا وان”.
خویا ژى كر، ئاریشا كۆژداندنا وى عه‌ردێ بۆ پاركێ هاتیه ده‌ستنیشانكرن هه‌بوو كو عه‌ردێ مه‌لاكا یه، له‌و دڤیا ئه‌و وه‌لاتیه بهێنه رازیكرن و قه‌ره‌بووكرن، داكو ئه‌و عه‌رده ببیته مۆلكێ حوكمه‌تێ و بشێین كار ل سه‌ر بكه‌ین و گۆت: “مه كۆژاندنا وى عه‌ردى یا داخواز كرى و نوكه ئه‌م ل گه‌ل باژێڕڤانیا دهۆكێ كار دكه‌ین كو قه‌ره‌بوویا وى خه‌لكى په‌یدا بكه‌ین و مافێ وان مه‌لاك و جۆتیارێن ماف د وى عه‌ردى دا هه‌ى، بهێته ده‌ستنیشانكرن و بگه‌هنه مافێ خوه، نوكه ئه‌م د قووناغا دووماهیێ یا كۆژاندنا عه‌ردى و قه‌ره‌بووكرنا وان وه‌لاتیان داینه یێ ماف د وى عه‌ردى دا هه‌ى و ل نێزیك دێ هێنه قه‌ره‌بووكرن”.
گۆتژى: “هه‌موو خزمه‌تگۆزارى د ناڤ پاركێ دا هه‌نه، مینا: جهێن وه‌رزشى بۆ وه‌لاتیان، جهێن هاژۆتنا پایسكلان، كافێ، خوارنگه‌ه، ئۆتێل و مۆتێلێن چار و پێنج ستێر، سیلاڤێن ئاڤێ و بركێن مه‌زن یێن ئاڤێ و سكرێن بچووك، جهێن بهێنڤه‌دانان و ل گه‌ل رووبه‌ره‌كێ زۆر یێ كه‌سكاتى و داروباران”.
ل دۆر شێوازێ ب جهئینانێ ژى ئه‌ندازیار كوردۆى گۆت: “ژ به‌ر كو پڕۆژێ پاركا گشتى یا دهۆكێ، پڕۆژه‌كێ مه‌زنه و كۆژمه‌كێ مه‌زن یێ پاره‌ى بۆ دڤێت، له‌و حوكمه‌ت دێ ب رێیا رێڤه‌به‌ریێن خوه یێن په‌یوه‌ندیار و وه‌به‌رهێنانێ دێ ب جهئینیت، دیسا ئه‌م دخوازین سه‌رمایه‌دار ژى بهێن وه‌به‌رهێنانێ تێدا بكه‌ن”.
