ب ڤیدیۆ – ماموستایه‌ك ب ئاواز و ستران وانه‌یا بیركاریێ دبیژيت
ئه‌ڤرۆ نیوز، نه‌وزاد هلۆرى:
ماموستایه‌كێ كومه‌لگه‌ها سیریێ یا سه‌ر ب ناحیا شێلادزێ ، هژماره‌كا خولێن بهێزكرنا وانه‌یا بیركاریێ بو قوتابیان ڤه‌كرن ،و به‌لێ ژبه‌ر به‌رچاڤگرتنا ره‌وشا دارایى و ئابوورى یا قوتابیان رابوو ب زڤراندا 15 ملیون دینارێن قوتابیان و خول بێ به‌رامبه‌ر بو قوتابیان هژمارت.
فه‌یزى ره‌مه‌زان رێكانى، ماموستایێ بیركارێ بۆ ئه‌ڤرۆ نیوز گۆت: (ئه‌ڤه نێزیكێ 17 سالایه ئه‌ز خولێن بهێزكرنا وانه‌یا بیركاریێ بو قوتابیان ڤه دكه‌م ، و هه‌تا نوكه نێزیكێ 15 هزار قوتابى پشكدارێ خولێن من بوینه ،و ئه‌ڤ ساله هزار و 300 قوتابى پشكدارێ خولێن من بوینه ، به‌لێ پشتى درێژبوونا ره‌وشا دارایى و ئابوورى ، من ب فه‌ردیت كو پارێ نێزیكێ 500 قوتابیێن خوه یێن خولان وه‌رنه‌گرم و بزڤرینم ڤه كو ئه‌و ژى دبیته نێزیكێ 15 ملیون دیناران).
زێده‌تر گۆت: (هه‌ر چه‌ند ئه‌ز ده‌رچویێ ئاماده‌یا پێشه‌سازى مه ،به‌لێ پشتى كو من ل مال خواندنى سوپاس بو خودێ من شیا خوه پێ بگه‌هینم و نها خولێن بیركاریێ بو هه‌موو قوناغێن خواندنێ ب رێڤه دبه‌م مینا رێزێن حه‌فت و هه‌شت و نه‌هێ بنه‌ره‌تى ، و ده‌هێ و یازدێ و دوازدێ ئاماده‌یى ب هه‌ردوو قوناغێت وێژه‌یى و زانستى، و رێژا ده‌رچونا قوتابیێن دهێنه خولێن من دبیته 99%).
ناڤبرى د درێژاهیا ئاخفتنێن خودا دیاركر ژى كو پێشتر هه‌ر قوتابیه‌كێ هاتبایه خولێن وى ئه‌وى ب مه‌رجێ ده‌رچوون پاره ژ قوتابیان وه‌ردگرت و زێده‌تر گۆت: (نها ژى هه‌ر قوتابیه‌كێ ره‌وشا وى یا دارایى و ئابوورى یا باش نه‌بیت و شیان نه‌بن پاره‌یێن خولێ بده‌ت ، ئه‌ز چوو پاره‌یان لێوه‌رناگرم، و دیسان ئه‌ز دێ لسه‌ر ڤه‌كرنا خولێن خوبه‌خش و بێ به‌رامبه‌ر به‌رده‌وام بم، و ئه‌و قوتابیێن كو دهێنه خولێن من ژبلى قوتابیێن سیریێ و شێلادزێ و دێره‌لووكێ ، دهه‌مان ده‌م دا قوتابیێن خولێن من ل ئامێدیێ و دهۆك و زاخو و ئاگرێ و ده‌ڤه‌را بارزان ژى دهێن ژ به‌ركو رێیا من یا خولێ رێیه‌كا تایبه‌ته و ئه‌ز ب سوحبه‌ت و ئاواز و ستران وانه‌یا بیركاریێ دبێژم).
ژلایێ یه‌كێ دن ڤه جه‌گه‌ر محه‌مه‌د به‌رپرسێ پشكا ئامار یا رێكخراوا په‌سار بو ره‌وشه‌نبیریا جڤاكى بو ئه‌ڤرۆ نیوز گۆت: (رێكخراوا په‌سار رابویه ب ڤه‌كرنا هژماره‌كا خولێن بێ به‌رامبه‌ر بو قوتابیێن ده‌ڤه‌رێ و هه‌تا نوكه 538 قوتابى هاتینه وه‌رگرتن، و دێ به‌رده‌وام ژى بیت ، و ئه‌و خولێن كو نها دهێنه ب رێڤه‌برن یێن وانه‌یا بیركارى و زمانێ عه‌ره‌بى نه، و ماموستایێن تایبه‌تمه‌ند ره‌زامه‌ندیا خوه ده‌ربریه كو ب رێڤه‌برنا خولا و مه‌ژى هوله‌كا تایبه‌ت بو گوتنا وانه‌یێن خولێ ته‌رخانكریه).
