ئێمناهی گرێدای حكومه‌تا ب هێزه‌

حكومه‌ت ده‌زگه‌هه‌كه‌ به‌لكو كه‌ڤنترین ده‌زگه‌هێ سیاسی یه‌ ل جیهانێ ، وژكه‌ڤندا كومه‌لگه‌هێ مروڤایه‌تی پێتڤی ب سه‌ركرده‌ وجێ به‌جێكارا هه‌بویه‌ بو رێكخستنا ژیانا ئه‌وان ، وحكومه‌ت شێوه‌كێ ده‌ستهه‌لات داریێ یه‌ دناف چڤاكان دا ، وئه‌فی ده‌زگه‌هه‌ی پێویستی ب هێزێ و یاسا هه‌یه‌ بو جێ به‌جێ كرنا یاسا ورێسا یێن پێتڤی بو پێشكێش كرنا خزمه‌تێ بو هاولاتیا تایبه‌ت دبوارێ ئێمناهیێ دا ، وچه‌ندین جورێن حكومه‌تا هه‌نه‌ و ژ وه‌لاته‌كی بو یێ دی وژ ده‌مه‌كی بو ده‌مه‌كێ دی تێنه‌ گوهورین لدیف سسته‌مێ سیاسی و رویدان وپێشكه‌فتنا ته‌كنولوجی وئاستێ ره‌وشه‌نبیریا چڤاكی ، وهه‌ر جوره‌كی ژ حكومه‌تێ بنیات وسالوخه‌تێن جودا هه‌نه‌ زێده‌باری جوداهیا بلان وبه‌رنامێ كارێ ئه‌وان و بناڤێن جوراوجور و ئه‌ف ده‌زگه‌هه‌ ژ چه‌ند وه‌زاره‌ت وده‌سته‌یا پێك تێن وهه‌ر وه‌زاره‌ته‌ك ب كارێ خو یێ تایبه‌ت رادبیت لدیف به‌رنامێ حكومه‌تێ دارشتی ، و وه‌زاره‌تێن ب كارێ پاراستن ودابین كرنا ئێمناهیا هاولاتیا رادبن گرنگی وسه‌نگا خو هه‌یه‌ دناف ئه‌وێ حكومه‌تێ دا ب وه‌زاره‌تێن (سیادی) تێنه‌ ب ناف كرن.
وهه‌ر وه‌لاته‌كی پلانه‌ك بو پاراستنا ئێمناهیێ هه‌یه‌ ژبه‌ر گه‌ف و مه‌ترسیێن نافخو و ده‌رڤه‌ , و بو ئه‌ڤێ مه‌ره‌مێ ده‌زگه‌هێن تایبه‌ت دروست كرینه‌ به‌رپرس بن ب دابین كرنا ئارامیێ ل ئه‌وی وه‌لاتی , و ئه‌ف ده‌زگه‌هه‌ وه‌ك حكومه‌تا سه‌ربه‌خو ب شێوه‌كێ به‌رده‌وام كارێ خو دكه‌ن و هاوولاتیا دپارێزیت دویر ژ جوداهیێن نه‌ته‌وه‌یی و ئاینی و ره‌گه‌زی و كارێ ئه‌وان ب گوهورینا حكومه‌تا و كه‌سێن به‌رپرس ناراوه‌ستیت ئانكو حكومه‌ته‌كا به‌رده‌وامن دناف وه‌لاتی دا , ئه‌ف ده‌زگه‌هه‌ نهێنیا هێزا هه‌ر حكومه‌ته‌كێ نه‌ و هه‌ر وه‌لاته‌كێ گرنگیێ ب ئه‌ڤان ده‌زگه‌ها بده‌ت ب ئه‌وی ئاستی ب هێز دكه‌ڤیت و ب ئه‌ركێ به‌رپرساتیا خو رادبیت و به‌روڤاژی ئه‌ڤێ چه‌ندێ ئه‌و حكومه‌تا ده‌زگه‌هێن ئێمناهیێ تێدا دلاوازبن دئه‌نجام دا حكومه‌ت هه‌می ب لاوازی تێته‌ نیاسین , ژبه‌ركو هه‌می كارێ حكومه‌تێ گرێدای دابین كرنا ئێمناهیێ یه‌ و چ به‌رنامه‌ و پلان د چ بواره‌كێ ژیانێ دابیت ئه‌وێ سه‌ركه‌فتنا پێتڤی ب ده‌ستڤه‌ نائینیت ل به‌ر سیبه‌را گه‌ف و مه‌ترسیا. ..
ئه‌ڤجا دیار دبیت هێزا حكومه‌تێ ژ هێزا ده‌زگه‌هێن تایبه‌ت ب ئێمناهیێ ڤه‌ یه‌ به‌لێ ب مه‌رجه‌كی ئه‌ف ده‌زگه‌هه‌ نه‌بنه‌ ئامرازه‌ك بو سه‌ركوت كرنا خه‌لكی و پاراستنا ده‌ستهه‌لاتێ , به‌لكو پاراستنا هاوولاتیا ئارمانجا سه‌ره‌كی بیت دهه‌می كار و بزاڤێن ئه‌وان دا , داكو باوه‌ریا ئه‌وی هاوولاتی بو خو دروست بكه‌ت و لدوماهیێ ببیته‌ پشته‌ڤان بو ده‌زگه‌هی بو بجه ئینانا ئارمانجێن خو , هاوولاتی بنیاته‌ بو كارێ هه‌ر حكومه‌ته‌كێ و حزمه‌ت كرنا وی ژ هه‌می لایه‌كی ڤه‌ ئارمانجه‌ و پاراستنا گیان و سامانێ وی خاله‌كا سه‌ره‌كی یه‌.
وگومان تێدا نینه‌ ئه‌و حكومه‌تا نه‌شێت ئارامیێ بو هاوولاتیێ خو په‌یدا بكه‌ت نه‌شێت چ به‌رنامه‌ و پروژا د چ بواران دا پێشكێش بكه‌ت و خه‌لكی باوه‌ری پێ نامینیت.

کۆمێنتا تە