موكمكرنا په‌یوه‌ندیێ د ناڤبه‌را ملله‌تی و پێشمه‌رگه‌ی دا گرنكیه‌كا بێوێنه یه
هه‌می وه‌لاتێن جیهانێ هێزێن چه‌كدار هه‌نه ژ بۆ پاراستنا ئاشتی و ئارامیا خاك و ملله‌تێ خوه، هه‌رێما كوردستانێ ژی وه‌ك پارچه‌ك ژ ڤێ جیهانێ هێزا پێشمه‌رگه‌هێ قه‌هره‌مان هه‌یه كو ئه‌ركێ پاراستنا سنۆرێن هه‌رێمێ و ئاشتی و ئارامیا گه‌لێ كوردستانێ ب ستویێ خوه ڤه گرتیه و هه‌ر ژ رۆژێن سه‌ختێن دیرۆكێ وه‌ره هه‌تا نها چو جاره‌كێ سستی د كارێ خوه دانه كریه، به‌لكو ب خین و گیانێ خوه ئه‌ركێ خوه بجه ئینایه. ئه‌ڤه ژی بۆ وێ چه‌ندێ دزڤریت كو گه‌لێ كوردستانێ هه‌رده‌م پێشمه‌رگه وه‌ك نموونه‌كا سه‌ربلندیێ ناسكریه و پالپشت بوویه بۆ سه‌ركه‌فتنا هێزێن پێشمه‌رگه‌ی، كو رۆژێن دیرۆكێ د شۆره‌شێن كوردستانی دا باشترین دیده‌ڤانن ل سه‌ر ڤێ چه‌ندێ، له‌ورا هه‌رده‌م دوژمنێن گه‌لێ مه جوداهی نه‌كریه د ناڤبه‌را هێزێن پێشمه‌رگه‌ی و خه‌لكێ سڤیلێ كوردستانێ دا كو هه‌ر چیا ژ ده‌ست هاتی ل هه‌مبه‌ر گه‌لێ كوردستانێ دا ئه‌نجامدایه و هه‌می هه‌ول و بزاڤێن خوه ئه‌نجامداینه ژ بۆ نه‌هێلانا ڤێ په‌یوه‌ندیا موكم د ناڤبه‌را خه‌لكێ كوردستانێ و پێشمه‌رگه‌ی وێ دا، لێ هه‌می هه‌ولێن وان یێن چه‌په‌ل سه‌رنه‌گرتن ژ به‌ر بلندیا هه‌ستا نه‌ته‌واتی ل ده‌ف گه‌لێ كوردستانێ و د نها جهێ دلخۆشیێ ژی ئه‌وه كو ئه‌ڤ په‌یوه‌ندیه د بلنترین ئاست دایه و گه‌لێ كوردستانێ ب هه‌می چینوته‌خێن جودا جودا ڤه وه‌ك (فه‌رمانبه‌ر، قوتابی، زارۆ، دانعه‌مر، لاو، ژن، پاله و جۆتیار.. هتد) پالپشتێن هێزێن پێشمه‌رگه‌ینه و هه‌می خه‌لك خوه ب پێشمه‌رگه دزانن، ل ڤێرێ گرنگیا ڤێ په‌یوه‌ندیێ دیار دبیت كو چه‌ند ئه‌ڤ په‌یوه‌ندیه یا موكم بیت دێ هند هێزا پێشمه‌رگه‌ی خوه ل سه‌نگه‌رێن شه‌ڕی راگریت و رۆژ بۆ رۆژێ دێ پتر مورالا وان بلند بیت، هه‌ر وه‌سا دێ رێ ل به‌ر دوژمنان به‌رزه بیت و دشیانێن وان دا نابیت كو بشێن ده‌رزه‌كێ بیخنه ڤێ په‌یوه‌ندیا پیلای د ناڤبه‌را خه‌لكێ كوردستانێ و هێزێن پێشمه‌رگه‌ی، هه‌روه‌سا موكومیا ڤێ په‌یوه‌ندیێ دێ رێ ل هه‌می هه‌ول و بزاڤێن پارچه‌كرنا به‌ره‌یێ كوردستانی گریت و دێ بۆ جیهانێ هه‌میێ هێته سه‌لماندن كو گه‌لێ كوردستانێ هه‌می پێشمه‌رگه‌یه و پێشمه‌رگه ژی جانگوریێ ڤی گه‌لی یه. ژ ئالیه‌كێ دیڤه گرنگیا موكومیا ڤێ په‌یوه‌ندیێ د وێ چه‌ندێ دا دیاردبیت كو خێزان و كه‌سوكارێن پێشمه‌رگان هه‌ست ب وێ چه‌ندێ كه‌ن كو ئه‌ندامێن خیزانێن وان ئه‌ڤێن ل ناڤ رێزێن پێشمه‌رگه‌ی، خودان رێزه‌كا تایبه‌تن و جهێ باوه‌ری و شانازیا گه‌لێ خوه‌نه. هه‌ر وه‌سا پێشمه‌رگه ژی هه‌ست ب وێ چه‌ندێ دكه‌ت كو چیایه‌كێ هێزێ یێ ل پشت و ناهێلیت دوژمن زیانێ بگه‌هینیته رێزێن وان. ئه‌ڤه ژی دێ بیته ئه‌گه‌رێ موكومیا رێزێن وان.
ژ ئالیه‌كێ دیڤه موكومكرنا ڤێ په‌یوه‌ندیێ خه‌لكێ سڤیلێ كوردستانێ ژی دێ هه‌ست ب وێ چه‌ندێ كه‌ت كو ئه‌ڤ ئارامیا ئه‌و تێدا ژ به‌رهه‌مێ ره‌نج و خه‌باتا هێزێن پێشمه‌رگه‌یه، ئه‌ڤه ژی دێ بیته ئه‌گه‌رێ بلندبوونا هه‌ستا نه‌ته‌واتی ل ده‌ف گشت كوردستانیه‌كی، له‌ورا چه‌ند بیروباوه‌را خه‌لكێ كوردستانێ ب هێزێن پێشمه‌رگه‌ی یا موكوم بیت هند دێ به‌ره‌یێ كوردستانی و ئیكرێزیا گه‌لێ مه یا موكوم و به‌رده‌وام بیت، له‌ورا پێدڤیه ل سه‌ر مه هه‌میان ئه‌م پالپشتێن هێزین پێشمه‌رگه‌ی بین د هه‌می بیاڤه‌كی دا و نه‌هێلین مۆرالا وان بهێته خار و كار ل سه‌ر وێ چه‌ندێ بكه‌ین كو باوه‌ریه‌كا مه‌زن بده‌یه پێشمه‌رگه‌هێن خوه و پالپشتیا خوه بۆ دیار كه‌ین و خوه ژ وان گوتگوتكان بده‌ینه پاش یێن نه‌حه‌زێن كوردستانێ به‌لاڤ دكه‌ن و ئیكرێزیا گه‌لێ مه تێك دده‌ن.
