794 پارچێن شوونواری ل گرێ باستكێ هاتنە دیتن
ئەڤرۆنيوز، سالار دۆسكی:
رێڤەبەریا شوونوارێن پارێزگەها دهۆكێ دكونگرەكێ رۆژنامەڤانی دا ئه‌ڤرۆ ئێكشه‌مبى 14/10/2018 ل گرێ باستكێ یێ سەر ب قەزا سێمێلێ ڤە دیتنا (794) پارچێن شوونواری راگەهاند.
د.حەسەن ئەحمەد قاسم، رێڤەبەرێ شوونوارێن پارێزگەها دهۆكێ دكونگرێ رۆژنامەڤانی دا دیاركر كو ده‌مێ سێ سالانە تیمێ هەڤپشكێ (kugamld) یێ ڤەكولینێن شوونواری كوردی و ئەلمانی ب رێڤەبەریا د. حەسەن ئەحمەد قاسم رێڤەبەرێ شوونوارێن دهۆكێ (د.بیرت فلیزنەر) ژ زانكۆیا (توبنگن) یا ئەلمانی كارێ ڤەكولینێن شوونواری ل گرێ باستكێ دكەن، ل دووڤ گرێبەستا هاتیە موركرن دناڤبەرا رێڤەبەریا شوونوارێن دهۆكێ ب رازیبووونا وەزارەتا باژێرڤانی و گەشتوگوزارێ و پشتەڤانیا كارگێریا پارێزگەها دهۆكێ بوویە، ل پائیزا سالا 2017 پتر ژ سەد تابلێتێن مزماری ژ ئالیێ ڤێ تیمێ ڤە هاتنە دیتن، ب رێكا ڤەكولینێ ل گرێ باستكێ یێ شوونواری، نوكە دپاراستی نە ل موزەخانا دهۆكێ یا نشتیمانی و ئەڤە ب دەسكەفتەك دهێتە هەژمارتن ژ مەزنترین دیتنێن شوونواری نه دماوێ پینجی سالێن بوری دا ل سەرانسەری رۆژهەلاتا ناڤین، دو ژ وان تابلێتان هاتینە شرۆڤەكرن و ژێ دیاردبیت، گرێ باستكێ ژ پاشمایێن باژێرێ ناڤدێرێ (مەردابان)ە ئەڤ ناڤە دێ تێكستێن مزماری دا هاتیە ل هزارا سیێ پ . ز، بناڤێ (مەردابان) (ماردابانو) ل هزارا دووێ (ماردامان) پەیڤەكا (سومەری) ە هەتا نوكە دكوردی دا مایە دەما دبێژنێ دوبان (دەشتا دوبان) ناڤێ دەڤەرەكێ یە هەتا ئەڤرۆ ئاكنجیێن كورد یێن ڤێ دەڤەرێ، كەڤنترین باژێرێ (هوری – سومەری) ل سالێ 2250 پ.ز. ژ ( ئالا رام سنی) ڤە هاتیە داگیریكرن پشتی (ئەگەدیا) دەست هەلاتا (سومەریا) ل موزوبوتامیا ژناڤبری پاشی سەربەخۆ وەرگرتی، ل سالا 1700 پ.ز. ژ ئالیێ خەلكێ چیایێ زاگرۆس ڤە هاتیە وێرانكرن، ل سالا 1250 ژئالیێ ئاشوریا ڤە هاتیە داگیركرن(مەردابان) مێرنشینەكا گرنگ و سەربەخۆ بوو ژلایێ ستراتیجی خالا پێكڤە گرێدانا باكور و باشورێ (موزوبوتامیا) بوو، رێكا سەرەكی بوو ئەڤ خالە ژی دیاردكەت كو ژ كەڤن دەولەت و باژێرێن ناڤدار ل كوردستانێ هەبوون، دەست خەت و نڤێسینێن هاتینە دیتن بڤان زمانان(سومەری، هوری، میتانی، ئەكەدی، ئاشوری، بابلی) گەلەك ناڤ و پێزانێن گرنگ ل سەر دەڤەرێ دڤان تابلێتان دا هەنە، ل پاشەرۆژێ دهێنە دیاركرن، رێڤەبەرێ شوونوارێن دهۆك گۆتژی: دبیت كو ئەڤ جهە پایتەختەكێ ناڤدارە ل ئایندە دێ پتر پێزانینان ل سەر شارستانیەتا كوردستانێ دهەموو بیاڤان دا دیار كەت ل چاخێن دیرۆكیێن تێڤەل دا ل سەر دەمێن(سومەری، هوری، ئەكەدی بابلی، میتانی، ئاشوری).
رێڤەبەرێ شوونوارێن پارێزگەها دهۆكێ هەمان كونگرێ رۆژنامەڤانی دا ئاشكراكر كو ل ڤێ دەڤەرێ، ل دووماهی یا وەرزێ ئەڤ سالە 2018 ئەڤ شوونوارە هاتینە دیتن ( فخار، ئامان) (111) (پەیكەرێن ئاخێ)(18)( پارچێن ژ ئاخێ هاتین دروستكرن)(138)( پارچێن ژ بەری هاتینە دروستكرن)(81)( كەرستێن كانزایی)(57) (ئالاڤێن جوانكاریێ)(175)(مور و كوپیێن كورا)(41)( پارچێن تبلێتا)(100)(پارچێن ژ هەستی هاتینە دروستكرن)(18)( پارچە رەنگا و رەنگ(1) (پارچێن ژ كسلێ هاتین دروستكرن)(2) پارچێن ژ شیشەی و فرتی هاتین دروستكرن(52) كویێ گشتیێ پارچێن شوونواری یێن هاتینە دیتن (794).