ده‌سكه‌فتێ (په‌یوه‌ندیێن دبلۆماسى)
ده‌سكه‌فتێ (په‌یوه‌ندیێن دبلۆماسى)
فره‌نسا وه‌ك میناك
شێرزاد نایف
ئێك ژ ئه‌گه‌رێن هه‌رى مه‌زن كو ب درێژیا دیرۆكێ كوردستان بمینیت بنده‌ست و سته‌ملێكرى، دووربوونا وێ ژ ناڤه‌ند و مه‌حافلێن نێڤده‌ولى و په‌یوه‌ندیێن وێ ژ جیهانا ده‌رڤه و ئه‌و وه‌لاتێن زلهێز و مه‌زن، لێ پشتى كو ره‌وشا هه‌رێما كوردستانێ پله‌یه‌كێ به‌ر ب پێشڤه‌تر چووى، ئه‌وبوو كیانه‌كێ نیمچه سه‌ربخوه وه‌رگرتى، پشتى هینگى ده‌ڤه‌ر گه‌رمبووى حه‌تا ئه‌ڤرۆ كو پتر بیاڤ و ده‌رگه‌هێن ل سه‌ر جیهانێ، ئێدى ده‌نگێ مه دگه‌هیت و نه به‌س ده‌نگ به‌لكو قه‌در و بهایێ كوردبوونێ باشتر لێهات، ژبلى ڤێ بیرۆدزێ هه‌لبه‌ت دیزاینه‌كا لۆژیكى و ئه‌ندازیاره‌كێ خوه‌دى سه‌بۆر ڤیا، كو هێزه‌ك و كه‌ساتیه‌كا مه‌زنتر بده‌ته هه‌رێما كوردستانێ، ئه‌ز ناڤه‌شێرم كو كه‌سێ شیاى ڤێ چه‌ندێ بكه‌ت، ئه‌وه كو كه‌سێ نێچیرڤان بارزانى سه‌رۆكێ حوكمه‌تا كوردستانێ، پشتى ڤان هه‌مى سه‌ربۆرێن مه‌زن و دژوار ب سه‌ر دا هاتین، بێى هه‌بوونا وه‌زاره‌ته‌كا ده‌رڤه پێگه‌یێ هه‌ولێرێ ژ یێ به‌غدا بهێزتر بكه‌ڤیت، ئه‌و مه‌حنه‌ته و مه‌زلۆمیه‌ته هه‌مى بوونه سامانه‌كێ به‌ره‌ڤاژى و ره‌نگڤه‌دانه‌كا ئه‌كتیڤ ڤه‌دا بۆ ره‌وشا هه‌رێمێ. ئێك ژ ڤان وه‌لاتێن كو نێچیرڤان بارزانى شیایى دلۆڤانى و پشته‌ڤانیا وى بده‌ست مه‌ڤه بینیت، وه‌لاتێ فره‌نسا بوویه، ل ده‌مه‌كى كو و د په‌یوه‌ندیێن ته‌له‌فۆنى دا ل گه‌ل سه‌رۆكێ فه‌رنسا ئیمانۆێل ماكرۆن پرۆسا سیاسى یا عیراقێ و پیكئینانا كابینه‌یا نوو په‌سه‌ندكر، سیاسه‌تا فره‌نسا و یا هه‌مى وه‌لاتێن ئه‌ورۆپى هه‌رده‌م به‌ر ب به‌لاسكرنا په‌یوه‌ندیان دچن، له‌ورا ته‌كه‌زى ل سه‌ر گرنگیا پشكداربوونا هه‌مى پێكهاتان دحوكمه‌تا عیراقێ دا كر، و رۆلێ گرنگێ لایه‌نێ كوردى بۆ چاره‌كرنا ئاریشه‌یان، ئه‌ڤ په‌یوه‌ندیێن كوردى فره‌نسى كه‌ڤنن و ژ مێژه وه‌ره خوه ژ سه‌رده‌مێ سه‌رۆكێ فره‌نسى یێ ناڤدار دیگۆل و حه‌تا ئه‌ڤرۆ، هه‌لبه‌ت ل سالێن شێستان دا ژى كامیرا به‌درخان ل فره‌نسا نووكرینه‌ڤه، حه‌تا گه‌هشتیه سالێن نۆتان و ئه‌و كۆچا ملیۆنى ل سه‌ر كوردان هاتى و خانما دانیال میتران جاره‌كا دى خوه ل كوردان كریه خودان، ئاخفتنه‌كا بارزانى جهێ خوه گرت ده‌مێ گۆتى ( كوردان دۆستێن راست و دروست هه‌نه ل ئه‌ورۆپا).
دیسا ژى سه‌ره‌دانا هۆلاند بۆ سه‌نگه‌رێن پێشمه‌رگه‌ى كو جارا ئێكێ بوو سه‌رۆكه‌ك ب ڤى شێوه‌ى بهێت و پشته‌ڤانیێ بكه‌ت تشته‌كێ گرنگ بوو. و پێشوازیكرنا وى بۆ بارزانى نه ژ ڤالاهیه‌كێ یه. ئه‌ڤ هه‌مى هۆكارێن هه‌نێ زێده‌بارى كه‌ساتیا نێچیرڤان بارزانى پێكه‌هێ كوردى بهێزتر خست د چاڤێ فه‌رنسا و ستراتیچیا وێ دا، بۆ حه‌زا لێكگوهارتنا به‌رژه‌وه‌ندیان و باشتر پاراستنا ده‌ڤه‌رێ و جیهانێ ژ مه‌ترسیێن تیرۆرێ، هه‌لبه‌ت رۆلێ پێشمه‌رگه‌ى ژى بۆ ڤێ بیردۆزێ رۆله‌كێ كاریگه‌ره و باوه‌رنه‌كه بكاریت هێزه‌كا ب ڤى ره‌نگى خۆبه‌خش ببینیت یا پیگیر ب فه‌رمانان كو بساناهى بهێنه بجهئینان. ئه‌ڤێ هه‌میێ دیزاینا خوه هه‌بوویه و مه به‌حس ژێ كر.
