لەیلا تەعلۆ بۆ باليۆزا ئاشتیێ
ئەڤرۆ نیوز ، زنار تۆڤی:
لەیلا تەعلۆ كو ژنەكا كوردا ئێزدیە و ئێك ژ رزگاربوویێن دەستێ داعشێ یە، ئەڤرۆ ب هەڤكاریا نڤێسینگەها رزگاركرنا رەڤاندیێن كوردێن ئێزدی ل باژێرێ دهۆكێ هاتە خەلاتكرن و دبیتە باليۆزا رێكخراوا جیهانی یا مافێ مرۆڤی.
باليۆزا ئاشتیێ لەیلا تەعلۆ دا بۆ ئەڤرۆ نیوز دیاركر: ب هەلكەفتا 70 سالیا راگەهاندنا جیهانی یا مافێ مرۆڤی ئەڤرۆ ئەو رۆژە ل دهۆكێ هاتە ساخكرن و تێدا من خەلاتێ رێكخراوا جیهانی یا مافێ مرۆڤی وەرگرت و ب ڤێ چەندێ ئەز وەكو ژنەكا كوردا ئێزدی گەلەك یا سەربلندم، ئەز ئێك ژ رزگاربوویێن دەستێ داعشێ مه و دیسا من سۆپاسیەكا تایبەت يا هەی بۆ خەلكێ دهۆكێ، چونكی ب هەموو رەنگان خەلكێ دهۆكێ هاریكاریا مه كریە، هەر ژ دەمێ ئاوارەبوونا مه و هەتا نوكە، دیسا مه دڤێت كو مه ڤەگەرنە سەر جه و وارێن خوە و دەڤەرێن مه بهێنە ئاڤەدانكرن”.
هەروەسا دياركر ئەو دێ بزاڤێ كەت كو ئەو كچێن ماینە د دەستێ تیرۆرستێن داعشێ دا هەموو بهێنە رزگاركرن.
گۆت ژی: ئەو ل گەل خێزانا خوە ل سالا 2014 كەفتبوونە دەستێ تیرۆرستێن داعشێ دا و هێشتا هندەك كەس ژ مالباتا وێ ماینە د دەستێ رێكخراوا تیرۆرست یا داعشێ دا و هندەك ژی هاتینە رزگاركرن، هەروەسا ل سالا 2017 ئەو ل گەل هەردو زارۆیێن خوە ژ دەستێ داعشێ رزگار بووینە.
