ئەمریکا پێنگاڤەکا فەلەستینیان وەک دەستپێکرنا شەری ل قەلەم ددەت
ئەڤرۆ:
دوھی گرۆپێ فەلەستینێ ل نەتەوێن ھەڤگرتی داخوازناما وەلاتێ خوە رادەستی جڤاتا گشتی کرن و تێدا دھێتە داخواز کرن کو قودس وەک پایتەختا فەلەستینێ بھێتە نیاسین و ھەتا سالا ٢٠١٧ ژی دڤێت ئیسرائیل ژ ھەموو وان دەڤەران دەرکەڤیت یێن کو بەری نھا داگیر کرینە و دوھی پرانیا وەلاتێن ئەندامێن نەتەوێن ھەڤگرتی پشتەڤانیا خوە بۆ داخوازیا فەلەستینێ دیار کرن، لێ ئەمریکا ب توندی ئەو یەک رەت کر و نوونەرێ ئەمریکا ل نەتەوێن ھەڤگرتی دیار کر کو ھەتا پرۆسا ئاشتیێ یا د ناڤبەرا ئیسرائیل و فەلەستینیان نەگەھیتە ئەنجامێ کریارێن ب ڤی رەنگی دێ ببنە ئەگەرێ دەستپێ کرنا شەرەکی گەلەک مەزن و ئەو یەک ژی خزمەتا چو ئالیەکێ ناکەت.
ل ئالیێ دی سەرۆک وەزیرێن ئیسرائیلێ ژی دیار کر کو ھەر پرۆژەیەک کو ل دژی بەرژەوەندیێن ئیسرائیلێ بن دێ ژ ئالیێ مە ڤە ھێتە رەت کرن و بێی رزامەندیا مە چو وەلاتەک ب ناڤێ فەلەستینێ نەشێت فەرمی بوونا خوە ل نەتەوێن ھەڤگرتی وەربگریت و گۆت: “ئالیێن سیاسی یێن فەلەستینێ د ناڤا خوە دا ئێکگرتی نینن و داخوازیێن وان ژی زەلال نینن، ژ بەر ڤێ یەکێ ژی ئاستەنگی ل ھەمبەر پرۆسا دانوستاندنان دروست بوو و وان ھێرشی ئاخا مە کر و ئەم ژی نەچار ماین کو بەرەڤانیێ ژ خوە بکەین و ژ بەر ڤێ یەکێ ژی ئەم رێ نادەین جارەکا دی مەترسیێن وەسا ل سەر وەلاتێ مە دروست بن”.
چاڤدێرێن سیاسی ژی دیار دکەن کو ھەکە داخوازیا فەلەستینێ بھێتە قەبوول کرن دێ شەرەکی نوو یێ مەزن د ناڤبەرا ھەر دو ئالیان دا دروست بیت و رەنگە ھندەک وەلاتێن دی ژی پشتەڤانیا فەلەستینێ بکەن و دێ شەرەکی مەزن ل دەڤەرێ دروست بیت و ئەمریکا ژی ژ ڤێ یەکێ گەلەک دلگرانە و دێ مافێ خوە یێ ڤیتۆیێ ل ھەمبەر ڤێ بزاڤا فەلەستینێ بکار ئینیت.
