دکتۆر مەحموود عوسمان: ترەمپ کەسەکێ بێ مێشکە
ئەڤرۆ نیوز، قائید میرۆ:
سیاسەتمەدارەکێ کورد سەرۆکێ ئەمریکا ب کەسەکێ بێ مێشک وەسف دکەت و دبێژیت، عیراقیان ب خوە ئەمریکا فێرکریە چو حسابا بۆ وەلاتێ وان نەکەت و سەرۆک وەزیرێن عیراقێ کارەکێ باش کریە کۆمبوونا ل گەل ترەمپی رەتکریە.
دکتۆر مەحموود عوسمان، سیاسەتمەدارێ کورد بۆ ئەڤرۆ نیوز دیار کر کو ھێشتا چو ھووردەکاریێن سەرەدانا نھێنی یا دۆنالد ترەمپ سەرۆکێ ئەمریکا بۆ عیراقێ نەھاتینە ئاشکرا کرن، بەلێ ب دیتنا وی ترەمپ کەسەکێ بێ مێشک و ترسنووکە، چونکی د سەرەدانا خوەیا نھێنی دا بۆ عیراقێ 60 فڕۆکێن شەڕکەر دگەل دا بووینە و فڕۆکا ئەو ژی تێدا یا گرتی بوویە و گۆت: “چو جاران مە نەدیتیە سەرۆکێ وەلاتەکی بڤی شێوەی سەرەدانا وەلاتەکێ دی بکەت”.
ئەڤی سیاسەتمەدارێ کورد گۆت ژی”سەربازگەھا سەربازێن ئەمریکا داخوازکریە عادل عەبدولمەھدی سەرەدانا وی بکەت، بەلێ سەرۆک وەزیرێن عیراقێ ئەڤ داخوازا ترەمپی رەتکریە و نەچوویە دگەل کۆمببیت ئەڤە ژی کارەکێ باشە عادل عەبدولمەھدی کری بۆ رەتکرنا داخوازا سەرۆکێ ئەمریکا”.،
ناڤھاتی ئاماژە دا وێ چەندێ کو ھەر دو سەرۆکێن بەرێ ژی یێن ئەمریکا وەک ترەمپی سەرەدانا عیراقێ کریە ب نھێنی ھاتینە و سەرکردێن عیراقێ سەرەدانا وان کر ل سەربازگەھا ئەمریکا، ئانکو عیراقیان ب خوە ئەمریکی فێرکرینە چو حسابا بۆ وەلاتێ وان نەکەن، ب راستی سەرۆکێ ئەمریکا کارەکێ نە رەوا کریە و بەرپرسێن بلندێن عیراقێ ژی چو ھەلویست نەبووینە.
