گەنجەكى 50 ئەپلیكەیشن دروستكرینە
ئەڤرۆ نیوز، نەوزاد هلۆری:
گەنجەكێ سنوورێ قەزا سوران بناڤێ عەبدولرەزاق میكائیل ئەڤە چەند سالەكە مۆژلێ چێكرنا ئەپلیكەیشنانە ب تایبەتی دوارێ خواندنا ئەلیكترونی دا، وەكو ئەو ددەت دیاركرن ئایندەیێ خواندنێ ب گشتی دێ كەڤیتە سەر ئەلیكترونی، ژبەرڤێ گرنگە كو ل كوردستانێ ژی سیستەمێ ئەلیكترونی ل دام و دەزگەه و پەرتوكخانەیان بهێتە كاراكرن.
عەبدولرەزاق بو ئەڤرۆ نیوز گۆت: (ئەڤە ل سالا 2006 هەتا نوكە ئەز مژولێ پروگرامسازی و چێكرنا بەرنامە و ئەپلیكەیشنانم و هەتا نوكە پتری 50 ئەپلیكەیشن من دروستكرینە و پرانیا وان ژی سیستەم و پروگرامكرنا بەرنامەیانە بو خواندنا ئەلیترونی و هندەك ژی پروگرامكرنا سیستەمێ خواندنێ یە بو رێزا 12ێ ئامادەیی ب تایبەتی بۆ ماددەیا مێژوو و جوگرافی).
زێدەتر گۆت: (نوكە سیستەمێ خواندنا ئەلیكترونی كارتێكرنەكا زور لسەر خواندنا لسەر كاغەزێ كریە، جیهانێ هەمویوێ بەرێ خوە دایە تورێن جڤاكی و موبایلێ و لاپتوپێ و هەمی كەس ژ خواندنا كاغەزی و گوهداریا رادیو و بینەریا كەنالان دویر كەفتینە و زێدەتر لسەر موبایل و لاپتوپ بینەری و گوهداری و خواندنێ دخوینن ژبەرڤێ من ژی ب فەردیت دەست ب درۆستكرنا سیستەم و بەرنامەیێن ئەلیكترونی وەكو ئەپلیكەیشن بكەم).
ناڤبری ل سالا 1987 ژ دایكبویە و ل قه‌زا سوران دژیت و دەرچویێ كولیژا زانستێن مروڤایەتی یە ل زانكویا سوران، دیسان دەرچویێ پشكا ئای تی ل پەیمانگەها سورانە و زێدەتر گۆت: (چێكرنا هەر ئەپلیكەیشنەكی ب گورەی بەرفرەهیا وی دمینیت، بەلێ ب شێوەیەكێ گشتی دیزاینا هەر ئێك ژ وان دناڤبەرا 15 بۆ 30 رۆژە، ئەڤە ژ ژبلی داخلكرنا داتا و زانیاریان، هەردیسان پرانیا وان ئەپلیكەیشنان ئەز بو خەلكی ب پارە دروست دكەم، هندەكان ژی بێ بەرامبەر دروست دكەم، پرانیا وان ژی بەرنامەیێن گرنگن بو رێكخستنا پەرتوكخانە و دام و دەزگەهان، ئەگەر پشتەڤانی بۆ من بهێنەكرن ئەز دشێم پروگرام و ئەپلیكەیشنێن گەلەك گرنگ و بهێز بۆ دام و دەزگەهێن حوكمەتێ و خەلكی ژی بكەم).
