ئاستێ ئاڤا رووبارێن ئامێدیێ جار و نیڤان زێده‌تر بلندبوویه
ئه‌ڤرۆ نیوز، نه‌وزاد هلۆرى:
ژ ئه‌گه‌رێ زور بارینا بارانێ ئه‌ڤ ساله ئاستێ ئاڤا هه‌ردوو رووبارێن ئاڤا شین و زیێ مه‌زن ل سنوورێ قه‌زا ئامێدیێ گه‌له‌ك بلندبویه، كو دبیته نێزیكێ جار و نیڤا به‌رامبه‌ر هندى سالا بوورى. خه‌مره‌ڤین ته‌یرو، ئه‌ندازیار ل هوبا ئاڤدانا ئامێدیێ بۆ ئه‌ڤرۆ نیوز گۆت: (ئه‌ڤ ساله ژ ئه‌گه‌رێ زور بارینا باران و به‌فرێ ل هه‌رێما كوردستان و باكوورێ كوردستانێ ئاستێ ئاڤا هه‌ردوو رووبارێن ئاڤا شین و رووبارێ زێ مه‌زن كو ل سنوورێ قه‌زا ئامێدیێ نه گه‌له‌ك بلندبوویه).
زێده‌تر گۆت: (ئه‌ڤ ساله هه‌تا ڤى ده‌مى ئاستێ ئاڤا رووبارێ ئاڤا شین 3.52م پارسال هه‌تا دوماهیا باران بارینێ 2.94م بوو، دیسان ئاستێ ئاڤا رووبارێ زێ مه‌زن 4م دبه‌رامبه‌ر دا سالا بوورى هه‌تا دوماهیا وه‌رزێ باران بارینێ 3.5م بویه، ئه‌ڤ یه‌ك ژى وه‌سا روون دبیت كو ئه‌ڤ ساله به‌رامبه‌ر سالا بورى جار و نیڤا ئاستێ ئاڤێ بلندبوویه).
ئه‌ندازیارێ ناڤبرى دیاركر ژى كو دهێته پێشبینیكرن كو ئاستێ ئاڤا وان هه‌ردوو رووباران هه‌تا دوماهیا وه‌رزێ باران بارینێ بگه‌هیته 5م. ل سنوورێ قه‌زا ئامێدیێ دوو رووبارێن سه‌ره‌كى و چه‌ند لقه رووباره‌كێن وه‌رزى هه‌نه، به‌لێ هه‌تا نوكه وه‌كو پێدڤى مفا ژ وان رووباران بو چاندنێ و پێشه‌سازى نه‌هاتیه وه‌رگرتن، تنێ ل گه‌لیێ ره‌شاڤه پرۆژه‌یه‌كێ كاره‌باى لسه‌ر دهێته دروستكرن.
