ئەڤ شەڤە شەڤبێریەکا مۆزیکێ دێ ل دھۆکێ ھێتە گێڕان
ئەڤرۆ نیوز، رێوار مزیری:
ئەنجومەنێ دھۆک یێ ئێکەتیا ئافرەتێن کوردستانێ دێ شەڤبێریەکا مۆزیکێ بۆ (ئیران عسمەت) و (رەڤەند عسمەت) ل دەمژمێر ٩:٠٠ ی شەڤا ٢٥/٥/٢٠١٩ێ ل پارکا ئازادی ل دھۆکێ گێڕیت.
رێژین نھێلی، بەرپرسا پشکا رەوشەنبیری و راگەھاندنێ ل ئەنجومەنێ دھۆک یێ ئێکەتیا ئافرەتێن کوردستانێ بۆ ئەڤرۆ نیوز دیار کر کو ب مەرەما بەرچاڤکرنا شیانێن ئافرەتێن مۆزیکژەن ئەو دێ ڤێ شەڤبێریا مۆزیکێ گێڕن کو ئەڤە د دەمەکی دا یە د ھەیڤا رەمەزانا پیرۆز دا ئافرەت گەلەک ب کارێن نافمالێ ڤە د وەستیێت، بەلێ ئامادەبوونا ئافرەتان د ڤێ شەفێریا مۆزیکێ دا دێ بیتە بھێنڤەدانەک کو ھەست ب ئارامیێ بکەت و گۆت: “ھەر کەسەکێ حەز ھەبیت مافێ ھەی د ڤێ شەڤبێریا مۆزیکێ دا ئامادەبیت”.
ناڤھاتیێ ئاماژە دا وێ چەندێ کو ھەر ژ دەستپێکا ھەیڤا رەمەزانا پیرۆز و ھەتا نوکە ھەموو ناڤەندێن سەر ب ئەنجومەنێ دھۆک یێ ئێکەتیا ئافرەتێن کوردستانێ ڤە یێ چالاکیان بێ جوداھی ل دەڤەرێن خوە ئەنجام ددەن وەکو کرینا جلکان بۆ زارۆیێن ھەژار و کێم دەرامەتان و کەرەستێن خوارنێ و سەرەدانێن نەخۆشان.
