ب وێنە: جوتیارێن دێرەلووک و شێلادزێ بڤی شێوەی برنجێ خوە ژ بەرازا دپارێزن
ئەڤرۆ نیوز، نەوزاد هلۆری:
پرانیا جوتیارێن سنوورێ قەزا ئامێدیێ ب گشتێ و هەردوو ناحیێن شێلادزێ و دێرەلووک ب تایبەتی ژبو پاراستنا بەرهەمێ برنجێ خوە ژ بەرازا، پەنا بریە بەر پەرژانکرنا زەڤیێن خوە، جوتیارەک ددەت دیارکرن هەر جوتیارەکێ زەڤیا خوە پەرژان نەکەت ئەو بەرهەمێ برنجی نابینیت.
نژیار هاریکی، جوتیارەکێ گوندێ هاریکێ یا سەر ب ناحیا دێرەلووکێ یە بۆ ئەڤرۆ نیوز گوت: (هەرسال پشتی چاندنا برنجی دڤێت زەڤیێن خوە پەرژان بکەین، ئەگەر بەرزان دێ هەموویێ پیچ کەت، چونکی بەراز گەلەک حەژ یاریێن دناڤ هەریا برنجی دکەت).
زێدەتر گوت: (هندەک ژ بەرازان یاریا دناڤ برنجێ دکەن، هندەک ژی بدوڤ حەشەرات و خوارنێ دگەریێن، دەما دناڤ دگەریێن مالک و دوریخێن برنجی دهێنە تێکدان و ئاڤا وێ خراپ دبیت، بڤێ یەکێ برنج هشک دبیت، بەلێ ئەگەر بهێتە پەرجانکرن، بەراز نەشێن بچنە دناڤ دا و بڤێ یەکێ برنج دێ ب سلامەت بیت).
ئازاد ئەحمەد، ئەو ژی جوتیارەکێ شێلادزێ یە و رێژەیەکا برنجی ل چەمێ دێویکێ چاندیە بۆ ئەڤرۆ نیوز گۆت: (پەرژانێ برنجی پێکدهت ژ نایلونەکێ سادە و ساناهی بو ژنابرنێ یان ژی سیمەکێ سادە، بەلێ ژبەرکو تنێ بەراز ب چاڤ برنجی نابینیت خوە ل بەرژانی نادەت، دیسان پەرژان تنێ بو هەردوو هەیڤێن دەستپێکا چاندنا برنجی گرنگە، ئەگەر برنج بلند بو، بەراز ناچیتە دناڤ دا، ژبەرڤێ گرنگە هەموو جوتیار برنجێن خوە پەرژان بکەن، بەروڤاژی یان دڤێت ببیتە زێرەڤان یان ژی ئەو دێ بێ بەهربیت ژ بەرهەمێ برنجی).
زێدەتر گوت: (ئەڤ سالە جودا ژ سالێن بوری خەلکی پتر برنج و کونجی و دەرامەت چاندیە، ژبەرکو ئەڤ سالە باران باش هاتن و خەلک ژی بەتالە لەورا زێدەتر گرنگیێ ب چاندنێ ددەن، ئەم دخوازین کو جهێن شولەژێ هاریکاریا جوتیاران بکەن، داکو ئەو بشێن بەردوام بن و زیان ب وان نەکەڤیت ب تایبەتی د فروتنا بەرهەمێ برنج و دەرامەتی دا).
برنجێ کوردی کو ل ڤان سالێن دوماهیێ پوتەکێ زور پێ دهێتەدان، ژبلی کو ساخڵەمە، دهەمان دەم دا تامەکا خوش هەیە، بەشەک ژ جوتیار و خەلکێ دەڤەرێ ب رێیا چاندن و فروتنا وێ داهاتەکێ بخوە پەیدا دکەن.
