تەرمێ کەسەکی د ناڤ خابووری دا دھێتە دیتن
ئەڤرۆ:
رێڤەبەرێ بەرەڤانیا باژێری ل زاخۆ ئاشکرا کر کو پشتی سێ رۆژان ژ دیار نەمانا وی، تەرمێ وەلاتیەکێ خەلکێ زاخۆ، د ناڤ رووبارێ خابووری دا دیتیە و ھاتیە دەرێخستن.
رائیدێ مافپەروەر زیاد بەیار، رێڤەبەرێ بەرەڤانیا باژێری ل زاخۆ بۆ رۆژناما ئەڤرۆ دیار کر، کەسوکارێن وی کەسێ گیانێ خوە ژ دەست دایی پشتی بوورینا سێ رۆژان ژ بێ سەروشوونبوونا وی ژنوو وان بەرەڤانیا باژێرێ ئاگەھدارکریە کو وان گۆمان ھەیە د ئاڤێ دا خەندقی بیت و گۆت: “پشتی تیمێن مە لێگەریاین، تەرمێ وی ل راستا گازینۆیا بەرامبەر پرا دەلال ژ خابووری ھاتە دەرێخستن”.
د سالا نوو دا ئەڤە ئێکەم حالەتە ھاتیە تۆمارکرن، ل گۆری گۆتنێن بەرەڤانیا باژێری ژی تەرمێ وی بۆ پزیشکیا داد ھاتیە ھنارتن، ب مەرەما دۆپاتکرنا ئەنجامێن گیان ژ دەست دانا وی.
