ریكلاما بازرگانى ب قانوون دێ هێته رێكخستن
ئەڤرۆ، سالار دۆسكی:
ئەندامەكێ پەرلەمانێ كوردستانێ ئاشكراكر كو كار ل سەر ده‌ركرنا قانونەكێ دهێتەكرن كو ریكلام بهێتە رێكخستن چنكو جۆرە نە زەلالیەك هەیە د بەلاڤەكرنا ریكلامێ دا ل كوردستانێ.
محسن دۆسكی، ئەندامێ پەرلەمانێ كوردستانێ ژ فراكسیوونا پارتی دیموكراتی كوردستان بۆ ئەڤرۆ نیوز گۆت: نوكە كارێ ل سەر پرۆژە قانوونەكێ دهێـتەكرن كو ریكلاما بازرگانی تێدا بهێتە رێكخستن و دوهى لژنا ره‌وشه‌نبیرى و وەرزش و لاوان یا په‌رله‌مانى كومبوون ل سەر ڤی بابەتی كریە و ئەڤرۆ دێ لژنا ناڤبری دێ ل گەل لژنا قانوونی ل پەرلەمانی راپورتەكا هەڤپشك دروست كەت ل سەر ڤی بابەتی.
دۆسكی ئەو ژی دیاركر كو گەلەك جاران ل سەر دیوارێن مزگەڤتان یان قوتابخانان یان هەر فەرمانگەهەكا حوكمەتێ ریكلام دهێنە دانان و گەلەك جاران كێشە و ئاریشە دروست دبن، رەنگە ئەڤی كاری پێدڤی ب قانوونەكا رێكخستی یا هه‌ى و دێ شێت پتر كارئاسانیا كەت و ئەڤە ژی پشتی راپورتا لژنا قانوونی دێ كار ل سەر هێـتەكرن.
گۆت ژى” ئەڤ كارە هاتەكرن پشتی لژنا ناڤبری ل سەر بابەتی گەلەك كونفرانس و كومبوون ل گەل كەسانێن شارەزا كرین و پرۆژە قانوونەك بەرهەفكری ل سەر بابەتی و دوهی راپورت هاتە نڤێسین و دووماهی كار دێ بۆ سەرۆكاتیا پەرلەمانێ كوردستانێ بیت كو خواندنا دویێ بهێتەكرن بۆ بابەتی و ئەندامێن پەرلەمانی ب گشتی بۆچوونێن خوە ل سەر بابەتی دیار بكەن”.
ناڤبری ئەو ژی گۆت: بەرەلایەك د ریكلامێ دا یا هه‌ى و هیچ قانوونەك نینە ل سەر وان دەزگەهێن ریكلامێ بەلاف دكەن و ماف و ئەركێن خوە نوزانن و دڤێ قانوونێ دا ماف دێ هێنە دیاركرن و كا كیش بابەت د قەدەغەكرینە و كیش دروستن.
