نزانم بوچی ئه‌ز غیرێ ب خووشك و برایێن خوه دبه‌م ؟
ئه‌ڤرۆ نيوز:
كچه‌كا 21 سالی دلێ خوه بو ئه‌ڤرۆ ڤه‌دكه‌ت و دبێژیت: ئاریشا من ئه‌وه ئه‌ز گه‌له‌ك غیرێ ب خووشك و برایێن خوه دبه‌م و نزانم بوچی؟ هه‌كو ئه‌ز دبینم هه‌موویان خێزان پێك ئینایه و خودان زارۆنه، دلێ من ب من دسوژیت و ئه‌ز گه‌له‌ك غیرێ پێ دبه‌م، چه‌ند ئه‌ز دچمه مالێن وان و ڤان دیمه‌نان دبینم، ده‌مێ ئه‌ز دزڤرمه مال ئاجز و توره دبم و بێهنا من ته‌نگ دبیت، ژبه‌رهندێ من بریار دا ته‌ركا وان بكه‌م، ژبه‌ركو بڤی ره‌نگی بو من باشتره، ئه‌ڤجا ب دیتنا هه‌وه ئه‌ز چاوا سه‌ره‌ده‌ریێ ل گه‌ل ڤان هه‌ستا بكه‌م، ژبه‌ركو هه‌ستێن غیرێ و یێن نه‌خوش بو من دروست دبن ل هه‌مبه‌ر خووشك و برایێن و ئه‌ڤه بو من یا نه‌خووشه، هیڤیدارم هوون چ دبێژن و ئه‌ز چ بكه‌م؟.
كچا عه‌زیز:
خوه رزگار كرن ژ ڤان هه‌ستێن نه‌خوش و غیرێ یا ب ساناهی نینه، ژبه‌ر هندێ گرنگه تو ده‌ست ب پروسا پاقژ كرنا ناخێ خوه بكه‌ی، هه‌ر كه‌سه‌كێ بڤێت خوه ژ ڤان هه‌ستا رزگار بكه‌ت دڤێت خویاتیا خوه پاقژ بكه‌ت و ئه‌ڤێ چه‌ندێ ژی ده‌م و بزاڤ پێ دڤێن، بو نمونه ده‌مێ تو بریارێ دده‌ی ناخێ خوه پاقژ بكه‌ی ژ هه‌ستێ كه‌ربێ و حه‌سوودیێ و غیرێ و نه‌ڤیانێ و… دڤێت یا راستگو بی ل گه‌ل خوه و دانپێدانێ ب هه‌ستێن خوه بكه‌ی.
ته گۆت ئه‌ز نزانم بوچی ئه‌ز غیرێ پێ به‌م؟ ئه‌ز دبێژمه ته چونكی ئه‌وان خالێن بهێز هه‌نه و لده‌ف ته نینن، ئه‌ڤجا ب دیتنا مه تو چاڤ ل وان نه‌كه، لێ بو خوه ژ وان فێر ببه، ژ خالێن وان یێن بهێز، ژبه‌ركو گه‌له‌ك مرۆڤێن زیره‌ك هه‌نه د دونیایێ دا خالێن بهێز و تشتێن باش و جوان لده‌ف هه‌نه و ئه‌م دشێین بو خوه ژێ فێر ببین.
چاره‌سه‌ری ئه‌و نینه تو ژ هه‌ستێن خوه و ژ راستیێ ب ره‌ڤی، دڤێت تو به‌رهنگاری هه‌ستێن خوه ببی و شه‌ری ل گه‌ل هه‌ستێن خوه یێن شاشا بكه‌ی، چونكی گه‌ر تو ته‌ركا وان بكه‌ی ئه‌ڤه یا خه‌له‌ته و باش نینه و بڤی ره‌نگی تو یا ئینكار دكه‌ی و ژ هه‌ستێن خوه د ره‌ڤی و چێنابیت ئه‌م ب هیچ ره‌نگه‌كێ ژ هه‌ستێن خوه ب ره‌ڤین، هه‌رده‌ما هه‌ستێ غیرێ لده‌ف ته لڤی و دروست بوو، پرسیارا ژ خوه بكه بوچی ئه‌ڤ هه‌سته ل ده‌ف ته په‌یدا بون؟ هه‌موو خالا لده‌ف خوه بنڤیسه و پێداچونا خوه بكه هه‌تا د هێیه د قوناغا هه‌ڤسه‌نگیێ دا، یان ژی ته رێیه‌كا دیتر یا هه‌ی كو تو بهێیه د قوناغا هندێ دا ئه‌و ژی تو خوه ژ وان باشتر لێ بكه‌ی. ل گه‌ل رێزگرتنێ
به‌رسڤدان: ده‌روونناس ئاواز
گۆشا دلێ خۆ ڤه ل سه‌ر فه‌يسبۆكى