رەوتێ سەدری: پێدڤیە بریارێن ستراتیژی ل عیراقێ ب پشکداریا ھەموو لایەنێن سیاسی بھێنە دان
ئەڤرۆ:
پەرلەمانتارەکێ فراکسیۆنا سائیروون یا سەر ب رەوتێ سەدری ڤە، کو مەزنترین فراکسیۆنە د جڤاتا نوونەرێن عیراقێ دا، راگەھاند، ب زەحمەتە بودجا گشتی یا عیراقێ بۆ سالا ٢٠٢١ بێ رێککەفتن ل گەل ھەرێما کوردستانێ بھێتە دەربازکرن.
ریاز مەسعودی، ئەندامێ جڤاتا نوونەرێن عیراقێ ژ فراکسیۆنا سائیروون بۆ دەزگەھێن راگەھاندنا عیراقی گۆت” ھێزێن سیاسی یێن عیراقێ دەستنابەن بۆ بژاردەیا پەسەندکرنا بودجا گشتی یا عیراقێ بۆ سالا ٢٠٢١، بێ ئەنجامدانا رێککەفتنەکێ ل گەل ھەرێما کوردستانێ و ئەو بژاردەیا یا دوورە”.
مەسعودی زێدەتر رۆھنکر” ژ ئەگەرێ رەوشا سیاسی ئەوا نوکە ل عیراقێ ھەی، ھزر د بژاردەیا دەربازکرنا بودجەی بێ کوردان ناھێتە کرن” ھەروەسا گۆت” ھۆکارێ وێ چەندێ ژی کو کارکرن ب وێ بژاردەیێ ناھێتە کرن تنێ ژبەر قانوونا بودجەی نینە، بەلکو ژ ئەگەرێ پەیوەندیێن سیاسی و ھەلبژارتنێن گشتی ل عیراقێ و پێکئینانا کابینا نوو یا حوکمەتا عیراقێ و ئەو پەیوەندیێن ھەرێما کوردستانێ ل سەر ئاستێ نێڤدەولەتی دا ھەین”.
پەرلەمانتارێ فراکسیۆنا سائیروون دیارکر ژی” ئێکرێزیا لایەن و پێکھاتێن سیاسی یێن عیراقی گەلەک یا گرنگە، ئەم دخوازین وێ پێکڤەبوونا سیاسی بپارێزین، ھەروەسا مە پێدڤی ب وێ چەندێ یا ھەی بریارێن ستراتیژی ب پشکداریا ھەموو لایەنێن سیاسی بھێنە دان”.
