سالڤه‌گه‌ڕا جینۆسایدا شنگالێ ل كه‌مپان هاته ساخكرن
دهۆك، له‌زگین جۆقی:
رێڤه‌به‌رێ كه‌مپا شاریا یا ئاوارێن شنگالێ دیار كر، دوهی 3/8/2021 ب هه‌لكه‌فتا سالڤه‌گه‌را جینۆسایدا شنگالێ، ئاوارێن كه‌مپێن شاریا و كه‌به‌رتۆ ئه‌ڤ سالڤه‌گه‌ره ب چه‌ند چالاكیان ساخ كر، لێ ژ به‌ر به‌لاڤبوونا كۆرۆنایێ چو خرڤه‌بوونێن مه‌زن نه‌هاتنه ئه‌نجامدان.
هه‌كار محه‌مه‌د ئه‌مین، رێڤه‌به‌رێ كه‌مپا شاریا بۆ رۆژناما ئه‌ڤرۆ خویا كر، ئاواره دخوازن عیراق ببیته ئه‌ندام د دادگه‌ها لاهای دا، داكو كه‌یسا جینۆسایدا شنگالێ بهێته ب رێڤه‌برن، چونكو هه‌تا عیراق نه‌بیته ئه‌ندام، ئه‌ڤ كه‌یسه وه‌كو پێدڤی ناهێته ب رێڤه‌برن و گۆت: “ئه‌ڤ ساله د ڤێ سالڤه‌گه‌رێ دا، ئاوارێن شنگالێ داخواز كرن كو عیراق ببیته ئه‌ندام د دادگه‌ها لاهای دا، داكو چو جینۆسایدێن دی دوباره نه‌بن”.
گۆتژی: “ئه‌ڤ ساله ژ به‌ر به‌لاڤبوونا كۆرۆنایێ، چو چالاكیێن مه‌زن ب هه‌لكه‌فتا سالڤه‌گه‌را جینۆسایدا شنگالێ نه‌هاتنه ئه‌نجامدان، لێ ئاوارێن شنگالێ لێك كۆمبوون و داخواز كرن ئێدی رێگری ل روودانا جینۆسایدان بهێته كرن”.
