وه‌زیرێ ناڤخوه: حوكمه‌تا هه‌رێمێ هه‌موو بزاڤان دكه‌ت قوربانیێن كاره‌ساتا شنگالێ بهێنه قه‌ره‌بووكرن
ئه‌ڤرۆ:
ب هه‌لكه‌فتا بۆرینا حه‌فت سالان ل سه‌ر كاره‌ساتا شانگالێ، دوهی 3/8/2021 شانده‌كێ لژنا بلند بۆ دانه‌نیاسینا جینۆسایدا تاوانێن شنگالێ ل سه‌ر ئاستێ حوكمه‌تا هه‌رێما كوردستانێ ب سه‌رۆكاتیا رێبه‌ر ئه‌حمه‌د، وه‌زیرێ ناڤخوه یێ حوكمه‌تا هه‌رێمێ و ب به‌رهه‌ڤبوونا دكتۆر عه‌لی ته‌ته‌ر، پارێزگارێ دهۆكێ سه‌را نڤێسینگه‌ها ده‌سته‌یا ڤه‌كۆلین و كۆمكرنا به‌لگه‌یان و چاره‌سه‌ریێ ل دهۆكێ دا و ژ لایێ حاكم ئه‌یمه‌ن، سه‌رۆكێ ده‌سته‌یێ و فه‌رمانبه‌رێن وێ پێشوازی لی َهاته‌كرن.
پشتی هه‌موو وه‌كو رێزگرتن بۆ گیانێ قوربانیێن كاره‌ساتا شنگالێ بۆ ده‌مێ خۆله‌كه‌كێ بێده‌نگ راوه‌ستیاین، شاندێ حوكمه‌تێ كۆمبوونه‌ك ل گه‌ل سه‌رۆك و فه‌رمانبه‌رێن ده‌سته‌یێ ئه‌نجام دا و د دووڤ دا گه‌ریانه‌ك د ناڤ ژوور و هۆلێن نڤێسینگه‌ها ده‌سته‌یێ دا كر و ژ نێزیك ل سه‌ر كارێ نڤێسینگه‌هێ و ئه‌و خزمه‌تا پێشكێش دكه‌ن، نه‌خاسمه دیكیۆمه‌نتكرنا تاوانێن داعش ل دژی سڤیلێن شانگالێ ئاگه‌هداربوون.
وه‌زیرێ ناڤخوه یێ حوكمه‌تا هه‌رێما كوردستانێ د كۆنگره‌كێ رۆژنامه‌ڤانی دا ده‌ستخوشی ل كار و چالاكیێن نڤێسینگه‌هێ كر ل هه‌مبه‌ر كۆمكرنا بالگه‌نامێن جینۆسایدا شنگالێ و سه‌ره‌خوشی ل كه‌سوكار و قوربانیێن كاره‌ساتێ كر و گۆت: “دوژمنێن گه‌لێ كورد نه ب تنێ جینۆسایدا شنگالێ ئه‌نجام دایه، به‌لكو ب درێژاهیا دیرۆكێ گه‌له‌ك تاوانێن ب ڤی ره‌نگی ل دژی ملله‌تێ كورد ئه‌نجام داینه”.
وه‌زیری َناڤخوه گۆتژی: “حوكمه‌تا هه‌رێمێ هه‌موو بزاڤان دكه‌ت كو ئێدی ئه‌ڤ تاوانێن دژی مرۆڤایه‌تیێ نه‌هێنه ئه‌نجامدان و ل سه‌ر ئاستێ نێڤده‌وله‌تی ژی ب جینۆساید بهێنه نیاسین و تاوانبار ژی بهێنه سزادان و قوربانیێن كاره‌ساتێ ژی بهێنه قه‌ره‌بووكرن”.
رێبه‌ر ئه‌حمه‌د د وی كۆنگرێ رۆژنامه‌ڤانی دا دیار كر، ئه‌و هه‌موو كێماسیێن ده‌سته‌یێ بۆ سه‌رۆكێ حوكمه‌تا هه‌رێمێ دێ بلند كه‌ن و یا پێدڤی دێ هێته كرن.
سه‌باره‌ت ئاوارێن شنگالێ، وه‌زیرێ ناڤخوه گۆت: “مه پێ باشه رێككه‌فتنا ئه‌منی یا شنگالێ وه‌كو خوه بهێته بجهئینان و هه‌موو هێزێن چه‌كدار یێن نه‌قانوونی ژ شنگالێ بهێنه ڤه‌كێشان و ته‌ناهیا ده‌ڤه‌رێ بهێته به‌رقراركرن و ده‌ڤه‌ر بهێته ئاڤه‌دانكرن و خزمه‌تگۆزاری بهێنه دابینكرن، داكو ببیته هانده‌ره‌ك ئاواره ڤه‌گه‌ڕنه سه‌ر جه و وارێن خوه”.
