كارگه‌ها ئاڤا باجانسۆركان ل هه‌ریر كه‌فته كاری
ئه‌ڤرۆ، ره‌مه‌زان هه‌رنی:
كارگه‌ها ئاڤا باجانسۆركان ل هه‌ریر كۆ ده‌مێ چه‌ندین سالایه هاتبوو دروستكرن و كارێن وێ هاتبوونه راگرتن، به‌لێ ئه‌ڤ ساله حوكمه‌تا هه‌رێمێ بودجه‌ك بۆ دابین كر و ده‌ست ب رێكخستنا وێ هاته كرن و ب به‌رهه‌ڤبوونا وه‌زیرا چاندنێ و پارێزگارێ هه‌ولێرێ كارگه‌ه كه‌فته كاری.
بێگه‌رد تاله‌بانی، وه‌زیرا چاندن و ژێده‌رێن ئاڤێ ل حوكمه‌تا هه‌رێمێ د كۆنگره‌كێ رۆژنامه‌ڤانی دا راگه‌هاند: “كه‌رتێ چاندنێ ئێك ژ وان كه‌رتان بوو كو حوكمه‌تێ هه‌ر ل ده‌ستپێكێ گرنگیه‌كا باش دایێ، بۆ وێ چه‌ندێ به‌رهه‌مێ ناڤخوه یێ جۆتیاران پتر بهێته ساخكرن و ژێ مفادار بن و گۆت: “پشكا دروستكرنا ئاڤا باجانسۆركان هاته‌ڤه‌كرن و د داهاتی دا دێ پشكێن دی ژی هێنه‌ڤه‌كرن”.
ئومێد خۆشناو پارێزگارێ هه‌ولێرێ د كۆنگرێ رۆژنامه‌ڤانی دا گۆت: “كابینا نه‌هێ یا حوكمه‌تا هه‌رێما كوردستانێ گرنگیێ ب كه‌رتێ چاندنێ دده‌ت، له‌و ب رژدی كار ل سه‌ر ڤێ كارگه‌هێ كر، ئه‌ڤ كارگه‌هه ده‌ستپێكه بۆ ڤه‌كرنا كارگه‌هێن مه‌زنتر و پشته‌ڤانیكرنا به‌رهه‌مێ ناڤخوه یێ جۆتیاران، دیسا نێزیكی 100 كه‌سان د ناڤ كارگه‌هێ دا دێ كار كه‌ن”.
شوان حه‌مید، رێڤه‌به‌رێ كارگه‌ها ئاڤا باجانسۆركان ل هه‌ریر به‌ری نوكه بۆ رۆژناما ئه‌ڤرۆ گوتبوو: “رۆژانه 60 بۆ 100 ته‌نێن باجانسۆركان ژ جۆتیاران دێ هێنه وه‌رگرتن و ب كوالێتیه‌كا بلند ئاڤا باجانسۆركان به‌رهه‌مئینیت، دیسا رۆژانه كارگه‌هێ شیانێن به‌رهه‌مئینانا 20 ته‌نێن ئاڤا باجانسۆركان هه‌نه”.
