ل ئامێدیێ ده‌ست ب سه‌ر 75 كیلۆیێن T N T دا هاته گرتن
ئامێدیێ، مه‌حمود نهێلی:
ل سه‌ر جاده‌یا د ناڤبه‌را دێره‌لۆكێ بو ئامێدیێ دا ل نێزیك خاله‌كا هێزا پێشمه‌گێ زێره‌ڤانی، دۆرێن 65 كیلۆیێن تیئێنتی دهێنه دیتن و ده‌ست ب سه‌ر دا دهێـته گرتن كو ب مه‌به‌ستا ته‌قاندنێ هاتبوونه به‌رهه‌ڤكرن.
ژێده‌ره‌كی ژ هێزا زێره‌ڤانی بو رۆژناما ئه‌ڤرۆ دیار كر، ئه‌و ژ لایێ سریا ئێك یا سه‌ر به‌تالیۆنا سێ یا هێزا كوماندۆ ڤه هاتینه ئاگه‌هدار كرن كو د ناڤبه‌را زالگه‌ها دێره‌ش و خالا وان یا ل سگێرێ دا تیئێنتی هاتیه دانان و گۆت: “هه‌ر زوو مه ده‌ست ب پێرابوونان كر و ژلایێ تیما ئه‌ندازیاری یا به‌تالیۆنا سێ یا كوماندۆ ڤه هاته ژناڤبرن كو نێزیكی 75 كیلۆیان بوون”.
دیار ژی كر، ئه‌و تیئێنتیه ب كونترۆلی هاتبوو دانان و به‌رهه‌ڤكرن ب ره‌نگه‌كێ دومدرێژ و هه‌رده‌مه‌كێ پێدڤی پێ هه‌بیت ب ته‌قینن كو ژ مادێ سیفور پێك دهات.
وی ژێده‌ری گۆت: “ئه‌و تیئێنتیه د تونێله‌كا درێژاهیا وێ حه‌فت میتر دا هاتبوو دانان ل بن جاده‌یا سه‌ره‌كی یا د ناڤبه‌را دێره‌لۆك بۆ ئامێدیێ دا نێزیك خاله‌كا پێشمه‌گه‌ی و هه‌كه هاتبا ته‌قاندن دا كاره‌ساتا دروست كه‌ت”.
