پاره بۆ بریندارێن شه‌ڕێ داعش دێ هێته مه‌زاختن
هه‌ولێر، قائید میرۆ:
حوكمه‌تا هه‌رێما كوردستانێ پێنج ملیار دینارێن مه‌زاختیێن چاره‌سه‌ركرنا بریندارێن شه‌ڕێ داعش به‌لاڤ دكه‌ت و به‌رپرسه‌كێ وه‌زاره‌تێ ژی دبێژیت: 11 هزار بریندارێن شه‌ڕێ داعش هه‌نه و هه‌تا نوكه ژی هژماره‌ك ژ وان پێشمه‌رگه‌یێن بریندار پێدڤی ب وه‌رگرتنا چاره‌سه‌ریێن نۆشداران هه‌نه.
دكتۆر رزگار عه‌لی عوبه‌یدولا، رێڤه‌به‌رێ كاروبارێن نۆشداری ل وه‌زاره‌تا پێشمه‌رگه‌ی بۆ رۆژناما ئه‌ڤرۆ گۆت: “ل شه‌ڕێ به‌رهه‌نگاریا داعش 11 هزار پێشمه‌رگه بریندار بووینه، به‌لێ هه‌موو پێشمه‌رگه‌یێن بریندار پێدڤی ب وه‌رگرتنا چاره‌سه‌ریێ نینن، ب تنێ هژماره‌كا برینداران نوكه پێدڤی ب وه‌رگرتنا چاره‌سه‌ریێ نه، ئه‌و ژی ئه‌و پێشمه‌رگه‌نه یێن برینێن وان دژوار، ل گوره‌ی سیسته‌مێ وه‌زاره‌تا پێشمه‌رگه‌ی هه‌ر برینداره‌كێ ل هه‌رێما كوردستانێ چاره‌سه‌ری هه‌بیت بۆ دهێته‌كرن هژماره‌كا زۆر ژی به‌ری نوكه چووینه ده‌رڤه‌ی وه‌لاتی”.
ژلایێ خوه‌ڤه سه‌ربه‌ست له‌زگین، بریكارێ وه‌زاره‌تا پێشمه‌رگه‌ی راگه‌هاند: “سه‌رۆكایه‌تیا جڤاتا وه‌زیران پێنج ملیار دینار بۆ بریندارێن شه‌ڕێ داعش مه‌زاختینه و ل سه‌ر وان نه‌خۆشخانا یێن چاره‌سه‌ریا پێشمه‌رگه‌یێن بریندار كری د سالێن بۆری دا دێ هێنه به‌لاڤكرن، ره‌زیبوونا مه‌زاختنا پاره‌ی هاتیه‌دان و نوكه وه‌زاره‌ت مژۆلی به‌لاڤكرنا ئه‌ڤی پاره‌یه”.
