فراكسیۆنا پارتی دێ هتده‌ك داخوازیه‌كان بۆ دهۆكێ ژ حوكمه‌تا هه‌رێمێ كه‌ت
ئه‌ڤرۆ، عه‌لی حاجی:
ب مه‌ره‌ما زێده‌تر دووڤچوون و خزمه‌تكرنا پارێزگه‌ها دهۆكێ شانده‌كێ فراكسیۆنا پارتی ل په‌رله‌مانێ كوردستانێ دێ سه‌ره‌دانا هه‌موو ده‌ڤه‌رداریێن سه‌ر ب پارێزگه‌هێ ڤه كه‌ت و سه‌ره‌دانا ئێكێ ژی بۆ باژێرێ زاخۆ بوو و ژلایێ به‌رپرسێ لقێ هه‌شتێ پارتیڤه پێشوازی لێ هاته كرن.
حكمه‌ت محه‌مه‌د گه‌ودا، ئه‌ندامێ په‌رله‌مانێ كوردستانێ بۆ رۆژناما ئه‌ڤرۆ گۆت: “ل دووڤ پلانا فراكسیۆنا پارتی ل په‌رله‌مانێ كوردستانێ دێ سه‌ره‌دانا هه‌موو ده‌ڤه‌رداریێن سه‌ر ب پارێزگه‌ها دهۆكێ ڤه كه‌ین، داكو ژ نێزیك ئاگه‌هداری وان ده‌ڤه‌ران بین ژ روویێ خزمه‌تگۆزاریان ڤه، دگه‌ل جهێن شوله‌ژێ ژی كۆمبوونا دێ كه‌ین، مه سه‌ره‌دانا قه‌زا زاخۆ كر و دگه‌ل به‌رپرسێ لقێ هه‌شتێ پارتی و قایمقامێ قه‌زا زاخۆ، به‌حسی كێماسی و پرۆژێن خزمه‌تگۆزاری و هنده‌ك بابه‌تێن دیتر كر، ئه‌م دخوازین ب یاداشتنامه‌یه‌كێ و ب رێیا ده‌سته‌یا سه‌رۆكایه‌تیا په‌رله‌مانێ كوردستانێ ئاراسته‌ی حكومه‌تا هه‌رێما كوردستانێ بكه‌ین، دا كو بشێن زێده‌تر خزمه‌تا پارێزگه‌ها دهۆكێ بكه‌ین”.
گۆتژی: “پشتی سه‌ره‌دانا هه‌موو ده‌ڤه‌ران دكه‌ین ژ نوو دێ وێ یاداشتنامێ ب ئێك پاكێج راده‌ستی سه‌روكایه‌تیا په‌رله‌مانی و حكومه‌تێ كه‌ین و ئارمانجا مه یا سه‌ره‌كی ژی ئه‌وه زێده‌تر خزمه‌تا ده‌ڤه‌رێ بهێته كرن”.
