توركیا رێیا ترۆمبێلێ دگه‌هینیته هنداڤی گوندێ كێسته
به‌رواری بالا، زنار تۆڤی:
رێڤه‌به‌رێ ناحیا كانی ماسێ دیار كر، سۆپایێ توركیا رێیا ترۆمبێلێ گه‌هاندییه گرێ متلێ ل هنداڤی گوندێ كێسته یێ سه‌ر ب ناحیا كانی ماسێ ڤه ل قه‌زا ئامێدیێ، هه‌روه‌سا سۆپایێ توركیا ب رێیا گوندێ نزدۆرێ و ل سه‌ر رووبارێ خابیری به‌ر ب چیایێ زنارا كێسته و ملا ره‌دێ رێك ڤه‌كرینه و ب شه‌فه‌ل و حه‌فاران خالێن نوو یێن له‌شكری داناینه و د هه‌مان ده‌م دا دار ژی بڕینه.
سه‌ربه‌ست سه‌بری ئاكره‌یی، رێڤه‌به‌رێ ناحیا كانی ماسێ بۆ رۆژناما ئه‌ڤرۆ دیار كر، ئه‌ڤه چه‌ندین رۆژه وان ئاگه‌ه ژ دروستكرنا وێ رێكێ هه‌ی، یا كو سۆپایێ توركیا ب شه‌فه‌ل و حه‌فاران ل گرێ متلێ ل نێزیك گوندێ كێسته چێدكه‌ت و گۆت: “ئینانا وان شه‌فه‌ل و حه‌فاران بۆ دروستكرنا هنده‌ك ره‌بیان و خالێن نوو یێن سه‌ربازینه و جهێن خوه موكمتر لێ دكه‌ن، د هه‌مان ده‌م دا رۆژانه سۆپایێ توركیا ده‌ڤه‌را به‌رواری بالا بوردۆمان دكه‌ت”.
ناڤهاتی گۆتژی: “ژ ئه‌گه‌رێ شه‌ڕێ د ناڤبه‌را په‌كه‌كێ و سۆپایێ توركیا دا، هه‌تا نوكه پتری 22 هزار دۆنه‌مێن ئه‌ردێ ئاڤی و دارستانێ هاتینه سۆتن و ئاقارێ هنده‌ك گوندان ژی ب ته‌مامی هشك بوویه، دیسا سێ وه‌لاتیێن وێ ده‌ڤه‌رێ ژ ئه‌نجامێ وی شه‌ڕی بریندار بووینه و وه‌لاتیه‌كێ گوندێ دێشێشێ ژی شه‌هید بوویه، ئه‌ڤه پتری چار هه‌یڤانه سۆپایێ توركیا ئۆپه‌راسیۆنه‌كا سه‌ربازی بۆ ده‌ڤه‌را به‌رواری بالا ده‌ستپێكری و چه‌ندین خالێن سه‌ربازی ل وێ ده‌ڤه‌رێ داناینه”.
