دو گه‌شتیارێن عه‌ره‌ب ژ لایێ توركیا ڤه هاتنه كوشتن
ئه‌ڤرۆ، عه‌لی حاجی:
قایمقامێ قه‌زا زاخۆ بۆ رۆژناما ئه‌ڤرۆ دیار كر، ل رۆژا ئه‌ینیا بۆری توپخانێن توركیا دو گه‌شتیارێن عه‌ره‌ب كوشتن و دوهی 22/8/2021 ته‌رمێ وان بۆ ده‌ڤه‌رێن وان هاتنه ڤه‌گوهاستن.
مشیر محه‌مه‌د، قایمقامێ قه‌زا زاخۆ گۆت: “هه‌ردو گه‌شتیارێن ب ناڤێ (یوسڤ عومه‌ر و ئه‌حمه‌د) كو دو وه‌لاتیێن ب ره‌گه‌ز عه‌ره‌ب وخه‌لكێ مووسلێ بوون، ل رۆژا ئه‌ینیێ 20/8/2021ێ ب هێجه‌تا گه‌شتیاریێ قه‌ستا ده‌ڤه‌را بانكێ یا سه‌ر ب قه‌زا زاخۆ ڤه كربوون، به‌لێ توپخانێن توركیا پوپباران دكه‌ن و گیانێ خوه ژ ده‌ست دده‌ن”.
گۆتژی: “خێزانێن وان ئه‌م ئاگه‌هدار كرین كو كه‌سوكارێن وان بۆ ده‌ما دو رۆژایه د به‌رزه‌نه، پشتی دووڤچوونان، دوهی ژ نوو ته‌رمێن وان هاتنه دیتن و بۆ نۆشداریا داد ل زاخۆ هاتنه ره‌وانه‌كرن و ل دووڤ دا ژی راده‌ستی كه‌سوكارێن وان هاتنه كرن، د ده‌مێ سالێن بۆری دا جارا ئێكێ یه وه‌لاتیێن ب ره‌گه‌ز عه‌ره‌ب دبنه ئارمانجا فرۆكه‌یێن سوپایێ توركیا”.
زێده‌تر گۆت: “ب هه‌بوونا چه‌كدارێن په‌كه‌كێ به‌رده‌وام ده‌ڤه‌رێن سنووری ل قه‌زا زاخۆ بووینه ئارمانجا سۆپایێ توركیا و هه‌تا نوكه چه‌ندین زیان ژی گه‌هاندینه ده‌ڤه‌رێن مه و رۆژانه ژی ده‌ڤه‌رێن مه دهێنه توپباران كرن”.
