چو بڕیارێن ئێكلاكه‌ر ل دۆر تڕۆمبێلێن بێ سالنامه نه‌هاتینه دان
هه‌ولێر، قائید میرۆ:
رۆژانه تڕۆمبێلێن بێ سالنامه ژلایێ مه‌فره‌زه‌یێن هاتنوچوونێ ڤه دهێنه ده‌سته‌سه‌ركرن و په‌یڤدارێ هاتنوچوونا هه‌رێما كوردستانێ ژی دبێژیت: ب تنێ وه‌زاره‌تا ناڤخوه ده‌ستهه‌لاتا هه‌ی بڕیارێ ل دۆر چاره‌نڤیسێ تڕۆمبێلێن بێ سالنامه بده‌ت.
عه‌مید ئه‌سعه‌د مه‌لا كه‌ریم، په‌یڤدارێ هاتنوچوونا هه‌رێما كوردستانێ بۆ رۆژناما ئه‌ڤرۆ دیار كر، ئاریشه‌یا تڕۆمبێلێن بێ سالنامه هێشتا وه‌كی خوه مایه و هه‌تا نوكه وه‌زاره‌تا ناڤخوه چو بڕیارێن ئێكلاكه‌ر ل دۆر تۆماركرنا تڕۆمبێلێن بێ سالنامه نه‌داینه و گۆت: “بڕیارا دووماهیێ د ده‌ستهه‌لاتا وه‌زاره‌تا ناڤخوه دایه و هه‌ر بڕیاره‌ك بهێته ده‌ركرن ئه‌ڤه بێگومان دێ بۆ هه‌موو رێڤه‌به‌ریێن هاتنوچوونێ هێته هنارتن و وه‌كی ئێك سه‌ره‌ده‌ری د گه‌ل دا هێته‌كرن”.
عه‌مید ئه‌سعه‌د مه‌لا كه‌ریم گۆتژی: “هه‌تا نوكه هژمارا وان تڕۆمبێلان دیار نینه، چونكو به‌ری نوكه هژماره‌ك ژ وان ژلایێ هاتنوچوونێ ڤه هاتبوونه تۆماركرن و زانیاری ل دۆر هاتینه تۆماركرن، به‌لێ هژماره‌كا زێده‌تر هه‌یه نه‌هاتینه تۆماركرن و د ده‌ستێ وه‌لاتیان دانه، به‌لێ رێڤه‌به‌ریێن هاتنوچوونێ ل گوره‌ی قانوونێ سه‌ره‌ده‌ریێ دگه‌ل تڕۆمبێلێن بێ سالنامه دكه‌ن”.
