سترانه‌كا نوو ل نێزیك دێ به‌لاڤ كه‌ت
دهۆك، زنار تۆڤی:
سترانبێژ عادل، كو ل سالا ۱۹۷۸ل گوندێ قه‌سیربه‌له‌كێ یێ سه‌ر ب نسێبینێ ڤه ل باكۆرێ كوردستانێ ژ دایكبوویه، د دیداره‌كێ دا بۆ رۆژناما ئه‌ڤرۆ دیاركر كو وی پێنچ سالان ل قۆتابخانا گوندی خواندیه، و دناڤ ئالۆزی و ناكۆكیێن ده‌روونی دا ژیانا خوه بۆراندیه، دیسان ل وی ده‌می كاسێت و ده‌نگێ سترانێن كوردی دڤیابا دناڤ حه‌فت دیواران دا هاتبانه ڤه‌شارتن و وی د ژیێ شه‌ش سالیێ دا، ئه‌و كاسێته ل كۆلانان به‌لاڤ دكرن و سترانێن هونه‌رمه‌ند شڤان په‌روه‌ر د دانه گوندیان.
ناڤهاتی گۆت: پشتی من قوناغا ناڤنجی ل نسێبینێ خواندی، ل گه‌ل مالبات و برایێن خوه د ژیێ ۱٦ سالیێ دا چووینه باژێرێ ئیسته‌مبۆلێ، ل سالا ۲۰۰٦ مه قه‌ستا وه‌لاتێ ئۆكرانیا كریه، پشتی چه‌نده‌كێ ماینه ل وی وه‌لاتی، من حه‌ز ژ كچه‌كا ئۆكرانی كری و پاشی هه‌ڤژینی ل گه‌ل پێكئینا، ل سالا 2019 من بریار دا ژ یانا خوه ب گوهۆرم و ده‌ست ب كارێ مۆزیكێ و گۆتنا سترانان بكه‌م، ئه‌ز حه‌ز ژ سترانێن محه‌مه‌د شێخۆی و مرادێ كنێ و محه‌مه‌د عارفی و محه‌مه‌د عه‌لی شاكری دكه‌م، ل ده‌ستپێكا سالا ۲۰۱۹ هه‌تا نوكه من نێزیكی ٥۰ سترانان گۆتینه و چه‌ندین ستران كلیپ كرینه، من وانێن مۆزیكێ ژی داینه چه‌ندین گه‌نجێن كورد و چه‌ندین ڤه‌كۆلین ژی ل سه‌ر سترانێن كوردی كرینه، نوكه ژی ئه‌ز مژوولی تۆماركرنا چه‌ندین سترانێن نوومه، ل نێزیك دێ سترانه‌كا ئه‌ڤینی به‌لاڤ كه‌م.
