ئالا سندی: وانا هونه‌ری ل پتریا قوتابخانان بتنێ ناڤه
دهۆك، شاكر ئه‌تروشی:
ئالا سندی، شێوه‌كار و ماموستا وانا هونه‌ری ل قوتابخانه‌كا زاخۆ، د دیداره‌كێ دا بۆ رۆژناما ئه‌ڤرۆ گازنده ژوێ چه‌ندێ كرن كو هه‌تا نوكه ل پتریا قوتابخان ب تایبه‌ت ژی یێن بنه‌ره‌ت، وانا هونه‌ری وه‌كو وانێن دی جهێ خوه د خشتێ وانێن حه‌فتیێ دا نه‌كریه و ئه‌ڤ چه‌نده بۆ خه‌مساریا رێڤه‌به‌ریێن قوتابخان، هه‌روه‌سا بۆ هنده‌ك ماموستان ژی زڤراند.
ئالایێ گۆت: هێشتا ئه‌م قوتابی بووین ل قوناغا سه‌ره‌تایی، ئانكو بێژین بنه‌ره‌ت مه نه‌دیت وه‌كو پێدڤی گرنگی ب وانا هونه‌ری دهاته دان و پتریا جاران ل ده‌مێ وانا هونه‌ری هه‌ی دا ماموستایه‌كێ دی هێته ژۆر و كه‌ته بابه‌ته‌كێ دی و بڤێ چه‌ندێ زه‌وقێ قوتابیان گه‌له‌ك تێك دچوو، هه‌روه‌سا پێ دئێشان ژی، لێ نوكه دڤێت ئه‌ڤه نه‌مینیت و په‌روه‌رده ل گه‌ل سه‌رپه‌رشتێن وانا هونه‌ری ب رژدی ل سه‌ر ڤێ چه‌ندێ راوه‌ستن، چنكو وه‌كو میلاك ماموستایێن وانا هونه‌ری دمشه‌نه و سالانه هژماره‌كا قوتابیێن چالاك ژ په‌یمانگه‌ها هونه‌رێن جوان و كولیژا هونه‌ری ده‌ردچن و پرانیا وان د بسۆریا خوه یا هونه‌ری دا كه‌سێن خودان شیانن و هه‌كه ب دروستی رێ ب وان بهێته دان و رێڤه‌به‌ریێن قوتابخانان نه‌هێلن وانا هونه‌ری ببیته وانه‌كا دی، ل وی ده‌می ماموستایێ هونه‌ری ژی دێ شێت ب شێوه‌كێ باش و ئه‌كتیڤ رۆلێ خوه بینیت و ئێدی وانا هونه‌ری ب دروستی دێ بیته وانا هونه‌ری.
ل دووماهیێ گۆت: هه‌تا نوكه ل زاخۆ بتنێ حه‌فت كه‌س ژ په‌یمانگه‌ها هونه‌رێن جوان ده‌رچووینه دووڤدا چووینه زانكۆیا دهۆك/ كولیژا زانستێن مرۆڤایه‌تی/ پشكا شێوه‌كاری ب دووماهی ئیناینه، و ئه‌ڤ حه‌فت ماموستایه گه‌له‌ك دكێمن بۆ باژێره‌كێ وه‌كی زاخۆ له‌ورا مه دخواست به‌ری ده‌رگه‌هێن قوتابخانان ڤه‌بن په‌روه‌ردا زاخۆ خوله‌كا پازده رۆژی بۆ وان ماموستایان ڤه‌كه‌ت ئه‌وێن وانا هونه‌ری دبێژن و نه تایبه‌تمه‌ندیا وان بیت دا هه‌ر چو نه‌بیت هنده‌ك تشتێن ده‌ستپێكی ل دۆر چاوانیا گۆتنا وانا هونه‌ری بگه‌هینه وان.
