به‌رێ بنیاتی بۆ هه‌ژماره‌كا پرۆژێن گرنگ ل ده‌ڤه‌رداریا به‌رده‌ڕه‌ش هاته دانان
دهۆك، له‌زگین جوقی:
ب مه‌ره‌ما دووڤچوون و دانانا به‌رێ بنیاتی بۆ هه‌ژماره‌كا پرۆژان ل سنوورێ ده‌ڤه‌رداریا به‌رده‌ڕه‌ش دوهی 5/9/2021 د. عه‌لی ته‌ته‌ر، پارێزگارێ دهۆكێ ب هه‌ڤالینیا هه‌ژماره‌كا رێڤه‌به‌رێن فه‌رمانگه‌هێن په‌یوه‌ندیدار سه‌را ده‌ڤه‌رداریا به‌رده‌ڕه‌ش دا و ژلایێ ئیسماعیل مسته‌فا، ده‌ڤه‌ردارێ نوو یێ به‌رده‌ڕه‌ش و به‌رپرسێن حزبی و ئیداری پێشوازێ لێ هاته كرن.
پاشی پارێزگارێ دهۆكێ ب ئاماده‌بوونا یێن د گه‌ل دا به‌رێ بنیاتی بۆ ڤان پرۆژان دانا:-
1- دانانا به‌رێ بنیاتی بۆ ئاڤاكرنا نه‌خۆشخانا ته‌نگاڤیان ل سه‌نته‌رێ ده‌ڤه‌رداریا به‌رده‌ڕه‌ش ب گوژمێ 960 هزار دۆلاران.
2- دانانا به‌رێ بنیاتی بۆ چێكرنا رێكێن ناڤخوه‌یی ل سنوورێ ناوچه‌داریا رۆڤیا ب گوژمێ 394 ملیۆن دیناران.
3- سه‌ره‌دانا سایلۆیا ستیلی ل ناوچه‌داریا رۆڤیا كو ل سه‌ر بودجا حكومه‌تا هه‌رێما كوردستانێ ب گوژمێ نێزیكی 18 ملیار دیناران هاتیه بجهئینان و پرۆژه ژ سایلۆیه‌كێ پێك دهێت كو شیان هه‌نه 40 هزار ته‌نێن گه‌نمێ جۆتیاران عمبار بكه‌ت و گوره‌پانێن وێ ژی شیان هه‌نه پتر ژ 60 هزار ته‌نێن گه‌نمێ جۆتیارێن ده‌ڤه‌رێن ئاكرێ و به‌رده‌ڕه‌ش عمبار بكه‌ت و پرۆژه 100% ب دووماهی هاتیه.
4- دانانا به‌رێ بنیاتی بۆ چێكرنا رێكێن ناڤخوه‌یی و چێكرنا سولینان ل ناڤ سه‌نته‌رێ به‌رده‌ڕه‌ش و تاخێ په‌ككه‌وتویان ب گوژمێ 963 ملیۆن دیناران.
5- دانانا به‌رێ بنیاتی بۆ چێكرنا رێكا گوندێن (به‌هره‌وان گه‌وره و به‌هره‌وانا نووی و به‌رده‌سور) ل ناوچه‌داریا داره‌تۆ ب درێژاهیا چار كیلۆمه‌تر و 600 مه‌تران ب گوژمێ پتر ژ 500 ملیۆن دیناران.
6- به‌رێ بنیاتی بۆ پرۆژێ رێكا گرنگ یا چه‌ند گوند و كۆمه‌لگه‌هێن (قه‌ره‌ناز، به‌نێنان، داره‌تۆ و كه‌وره سور) هاته دانان.
پارێزگارێ دهۆكێ ب نوونه‌راتیا مسرور بارزانی، سه‌رۆكێ حوكمه‌تا هه‌رێما كوردستانێ په‌یڤه‌ك پێشكێش كر و گۆت: “ب گوژمێ پتر ژ 400 ملیار دیناران پرۆژه ل سه‌رانسه‌ری پارێزگه‌هێ دهێنه ئه‌نجامدان و هنده‌ك ب دووماهی هاتینه و هنده‌ك ژی ل ژێر قووناغێن بجهئینانێ نه و هنده‌ك ژی لڤان نێزیكان دێ كه‌ڤنه د وارێ بجهئینانێ دا و به‌رنامێ ئاڤه‌دانكرنێ یێ به‌رده‌وامه، دیسا نوكه ب گوژمێ 48 ملیار دیناران پرۆژه ل سنوورێ ده‌ڤه‌رداریا به‌رده‌ڕه‌ش دهێنه ئه‌نجامدان و ب هزاران ده‌لیڤێن كاری دێ هێنه دابینكرن و وه‌لاتی دێ مفای ژێ وه‌رگرن.
د. ئه‌فراسیاب موسا، رێڤه‌به‌رێ گشتی یێ ساخله‌میا پارێزگه‌ها دهۆكێ بۆ ئه‌ڤرۆ گۆت: “نه‌خۆشخانا ته‌نگاڤیان ل به‌رده‌ڕه‌ش ل سه‌ر رووبه‌رێ هزار و 400 مه‌ترێن دو جار یێن ئه‌ردی دێ هێته ئاڤاكرن، ژ 12 ته‌ختان دگه‌ل ژوورا نشته‌رگه‌ریا و هه‌موو پێدڤیێن نه‌خۆشخانا ته‌نگاڤیان وه‌كو تیشك و پشكنین و سونه‌ر و تاقیگه‌هێ پێك دهێت ئه‌ڤ پرۆژه ژلایێ خێرخوازه‌كی ڤه دهێته بجهئینان و بڕیاره د ده‌مێ 300 رۆژان دا ب دووماهی بهێت”.
