دووماهی پێزانین ل سه‌ر روودانا دزیا ل دهۆكێ هاتنه راگه‌هاندن
دهۆك، نه‌وزاد هلۆری:
رێڤه‌به‌ریا گشتی یا پۆلیسێن پارێزگه‌ها دهۆكێ د كۆنگره‌كێ رۆژنامه‌ڤانی دا هه‌موو هووركاریێن پێدڤی ل سه‌ر تاوانا دزیا به‌ری سێ رۆژان ل باژێرێ دهۆكێ راگه‌هاندن و به‌رپرسێ راگه‌هاندنا پۆلیسێن پارێزگه‌ها دهۆكێ ژی دبێژیت: هه‌تا نوكه تاوانبار نه‌دیارن و ئه‌م دووڤچوونێ ل سه‌ر روودانێ دكه‌ین.
هێمن سلێمان، به‌رپرسێ راگه‌هاندنا پۆلیسێن پارێزگه‌ها دهۆكێ گۆت: “سێ رۆژان به‌ری نوكه ل گه‌ره‌كا مالتایێ ل باژێرێ دهۆكێ دزی ژ ماله‌كێ هاته‌كرن و ب گوره‌ی ئاخڤتنێن خودانێ مالێ 260 ده‌فته‌رێن دۆلاری و چار كیلۆیێن زێڕی ژ مالا وی هاتینه دزین، پشتی شه‌ش ده‌مژمێران خودانێ مالێ پۆلیس ل سه‌ر دزیێ ئاگه‌هداركرن، له‌وا هه‌ر ئێكسه‌ر پۆلیسان ده‌ست ب دووڤچوون و ڤه‌كۆلینێ ل سه‌ر روودانێ كر و هه‌تا نوكه دووڤچوون و ڤه‌كۆلین د به‌رده‌وامن”.
زێده‌تر گۆت: “ب گوره‌ی ماددا 443ێ ژ قانوونا سزایی یا عیراقی بڕیارا گرتنێ بۆ تومه‌تباران ده‌ركه‌فتیه و هه‌ژماره‌كا زۆر یا ئه‌فسه‌ر و ڤه‌كۆله‌ر و كه‌سانێن تایبه‌تمه‌ند د وارێ تاوانێن مه‌زن دا دووڤچوون و ڤه‌كۆلینێ ل سه‌ر روودانێ دكه‌ن، هه‌رده‌مێ تومه‌تبار هاتنه گرتن دێ هووركاریێن دووماهیێ بۆ رایا گشتی راگه‌هینین، د نوكه دا چو كه‌س نه‌هاتینه ده‌ستنیشانكرن و گرتن و هه‌موو هووركاریێن روودانێ و نهێنیێن وێ ژلایێ پۆلیسان ڤه د پاراستینه، داكو كارتێكرن ل سه‌ر به‌رزه‌بوونا روودانێ نه‌هێته‌كرن و ئه‌م د نوكه دا به‌لاڤ ناكه‌ین”.
هێمنی دیار ژی كر، ئه‌ڤه جارا ئێكی نینه تاوانه‌كا بڤی ره‌نگی مه‌زن ل پارێزگه‌ها دهۆكێ دهێته‌كرن و گۆت: “به‌ری چار سالان ژی دزیه‌كا ژ دزیا نوكه مه‌زنتر ل پارێزگه‌ها دهۆكێ هاتبوو كرن، به‌لێ پۆلیس شیان وان كه‌سان بگرن و پاره‌ی ژی بۆ خودانی بزڤڕیننه ڤه، دیسا به‌ری چه‌نده‌كێ دو كه‌سێن دی سه‌را پارێ سه‌خته ل دهۆكێ هاتنه گرتن كو پتری چار ده‌فته‌رێن دۆلارێ سه‌خته ئێخستبوونه د ناڤ بازاڕی دا”.
