هه‌ژماره‌كا پرۆژان ل سنوورێ ناوچه‌داریا فه‌یدیێ هاتنه ڤه‌كرن
ئه‌ڤرۆ:
ب مه‌ره‌ما دووڤچوونا پرۆژێن خزمه‌تگۆزاری ئه‌وێن ل سنوورێ ناوچه‌داریا فه‌یدیێ ل ده‌ڤه‌رداریا سێمێلێ دهێنه ئه‌نجامدان دوهی 7/9/2021 ب د. عه‌لی ته‌ته‌ر، پارێزگارێ دهۆكێ ب هه‌ڤالینیا هژماره‌كا رێڤه‌به‌رێن فه‌رمانگه‌هێن په‌یوه‌ندیدار سه‌را رێڤه‌به‌ریا ناوچه‌داریا فه‌یدیێ دا و ژلایێ خه‌لیل مه‌حمود، ده‌ڤه‌ردارێ سێمێلێ و عادل ئه‌مین رێڤه‌به‌رێ ناوچه‌داریا فه‌یدیێ و چه‌ند به‌رپرسێن حزبی و ئیداری پێشوازی لێ هاته كرن و د روونشتنه‌كێ دا به‌حسێ پێدڤیێن خه‌لكێ ده‌ڤه‌رێ ب پرۆژێن خزمه‌تگۆزاری ب گشتی هاته كرن.
پاشی پارێزگارێ دهۆكێ ب ئاماده‌بوونا سیروان رۆژبه‌یانی، جێگرێ پارێزگارێ نه‌ینه‌وا ئه‌ڤ پرۆژه ڤه‌كرن و به‌رێ بنیاتی بۆ هنده‌كێن دی دانا:-
1- ڤه‌كرنا هه‌ژماره‌كا جادێن ناڤخوه‌یی ل ناڤ سه‌نته‌رێ كۆمه‌لگه‌ها دومیز و ناوچه‌داریا فه‌یدیێ ب درێژاهیا شه‌ش كیلۆمه‌تر و 500 مه‌تران.
2- ڤه‌كرنا ئاڤاهیێ سه‌رۆكاتیا باژێرڤانیا فه‌یدیێ و قوتابخانه‌كا 12 رێزی و باخچه‌كێ زارۆكان و ئاڤاهیێ هوبا چاندنێ ل سه‌نته‌رێ ناوچه‌داریا فه‌یدیێ.
3- ڤه‌كرنا چه‌ند جادێن خزمه‌تگۆزاری د ناڤ سه‌نته‌رێ ناوچه‌داریا فه‌یدیێ دا.
4- دانانا به‌رێ بنیاتی بۆ چێكرنا یاریگه‌هه‌كا وه‌رزشی ل كۆمه‌لگه‌ها شاریا ب گوژمێ 120 ملیۆن دیناران كو ژلایێ ئێكه‌تیا لاوێن دیموكراتا كوردستانێ ڤه دێ هێته ئه‌نجامدان.
5- دانانا به‌رێ بنیاتی بۆ قێركرنا رێكێن ناڤخوه‌یی و چێكرنا سولینه‌كا ئاڤرێژ ل سه‌نته‌رێ كۆمه‌لگه‌ها شاریا ب گوژمێ 374 ملیۆن دیناران.
پاش پارێزگارێ دهۆكێ و جێگرێ پارێزگارێ نه‌ینه‌وا و یێن د گه‌ل دا سه‌را ناوچه‌داریا ئه‌لقوش دا و ژلایێ خانم لارا یوسف، رێڤه‌به‌را ناوچه‌داریێ و چه‌ند رێڤه‌به‌رێن فه‌رمانگه‌هێن ده‌ڤه‌رێ پێشوازی لێ هاته كرن.
د دووڤ دا و د رێوره‌سمه‌كێ تایبه‌ت دا ب ئاماده‌بوونا رێڤه‌به‌رێ گشتی یێ ره‌گه‌زنامێ ل پارێزگه‌ها نه‌ینه‌وا و چه‌ند به‌رپرسێن ئێمناهیا ده‌ڤه‌رێ فه‌رمانگه‌ها كارتا نیشتمانی ل ئه‌لقوش هاته ڤه‌كرن.
ل دووماهیێ یاریگه‌هه‌كا بچیكری یا پێنج یاریزانی ل سه‌نته‌رێ ناوچه‌داریا ئه‌لقوش هاته ڤه‌كرن.
پارێزگارێ دهۆكێ د داخویانیه‌كێ دا گوت: “مه ب هه‌ماهه‌نگی دگه‌ل پارێزگه‌ها نه‌ینه‌وا هه‌ژماره‌كا پرۆژێن خزمه‌تگۆزاری وه‌كو جادێن ناڤخوه‌یی و رێكه‌كا گرنگ ژ جادا دو سایدی ل فه‌یدیێ و پرۆژێن په‌روه‌ردێ و چاندنێ وه‌رزشی و.. هتد ڤه‌كرن، دیسا به‌رێ بنیاتی بۆ هنده‌كێن دی دانا ئه‌و پرۆژێن ل سنوورێ ناوچه‌داریا فه‌یدیێ هاتینه ڤه‌كرن و به‌رێ بنیاتی بۆ هاتیه دانان گوژمێ وان دبیته هه‌شت ملیار و 565 ملیۆن دینار كو ل سه‌ر بودجا گه‌شه‌پێدانا پارێزگه‌هان ب هه‌ماهه‌نگی د ناڤبه‌را پارێزگه‌ها دهۆك و نه‌ینه‌وا دا دهێنه ئه‌نجامدان”.
پارێزگه‌ری گۆتژی: “مه سه‌ره‌دانا ناوچه‌داریا ئه‌لقوش ژی كر، ل وێرێ ژی فه‌رمانگه‌ها ده‌رئێخستنا كارتا نیشتمانی و یاریگه‌هه‌كا وه‌رزشی هاتنه ڤه‌كرن، ب ره‌نگه‌كێ گشتی مه هه‌ڤكاریه‌كا باش دگه‌ل پارێزگه‌ها نه‌ینه‌وا هه‌یه بۆ گه‌هاندنا پرۆژێن خزمه‌تگۆزاری بۆ خه‌لكێ مه ل ده‌ڤه‌رێن ماددێ 140″.
