ئه‌و ژنا حه‌ز ژ تیێ خوه كری پلانا وێ سه‌رنه‌گرت
دهۆك، شاكر ئه‌تروشی:
نڤیسه‌ر و ده‌رهێنه‌ر (وه‌لید محه‌مه‌د تاهر) د دیداره‌كێ دا بۆ رۆژناما ئه‌ڤرۆ دیاركر كو دووماهی پرۆژێ نوكه ئه‌و ل سه‌ر كاردكه‌ن چێكرنا كورته فلمه‌كی یه ب ناڤێ ( بۆ فرۆتنێ) و ل چه‌ند رۆژێن بهێن دێ یێ به‌رهه‌ڤ بیت بۆ نیشادانێ ل فلمه فیسته‌ڤالێن جیهانی.
وه‌لید گۆت: ئه‌ڤ كورته فلمه ژ نڤیسینا زانیار محه‌مه‌دی یه، كو خه‌لكێ رۆژهه‌لاتێ كوردستانێ، فلم ب زمانێ فارسی یه و هه‌موو ئه‌كته‌رێن پشكدار ئیرانی نه، ل دووف داخوازا وان ئه‌ز ب كارێ ده‌رهێنانێ رابوویمه، ناڤه‌رۆكا كورته فلمی ل دۆر كه‌سه‌كی یه ب ناڤێ (حه‌مید) ژیێ وی پێنجی سالن تووشی ئێشا گران بوویه نۆشداران ئه‌و ئاگه‌هدار كریه هه‌تا دو هه‌یڤێن دی دێ مریت، هه‌ڤژینا وی ژی یا گه‌نجه و چه‌ند سالان ژوی بچووكتره بزاڤێ دكه‌ت به‌ری ئه‌و بمریت خانی ب رێیه‌كا نه‌دروست ب فرۆشیت، له‌ورا په‌یوه‌ندیێن نه‌شه‌رعی ل گه‌ل برایێ حه‌میدی ئانكو (تیێ) خوه گرێ دده‌ت و د بێژیتێ هه‌تا دو هه‌یڤێن دی برایێ ته دێ مریت و خانی دێ بۆ من و ته مینیت، تیێ وێ رازی دبیت و بزاڤێ دكه‌ن هێشتا حه‌مید یێ ساخ خانیێ وی بفرۆشن، لێ بزاڤا وان سه‌رناگریت، و پشتی دمریت ژی بۆ وان دیار دبیت كو به‌ری مرنێ وی خانیێ خوه یێ پێشكێشی رێكخراوه‌كا مرۆڤایه‌تی كری.
ده‌رهێنه‌ری كورته فلمی گۆت: ستافێ فلمی هه‌موو (14) كه‌سن، و ژبه‌رهه‌مێ كۆمپانیا ( ) نوكه یێ دهێته مۆنتاژكرن و به‌ر ب قوناغا دووماهیێ یه و بۆ جارا ئێكێ دێ ل هوله‌ندا هێته نیشادان، دووڤدا بۆ پشكداریكرنێ د فیسته‌ڤالێن سینه‌مایی یێن نێڤده‌وله‌تی دا دێ یێ به‌رهه‌ڤ بیت.
ولید محه‌مه‌د تاهر، ژ دایكبوویێ سالا 1976 یه، ده‌رچوویێ پشكا شانۆیێ یه ل په‌یمانگه‌ها هونه‌رێن جوان ل دهۆكێ، هه‌تا نوكه ب كارێ ده‌رهێنانا پێنج فلمان رابوویه و سێ فلم ژی نڤیسی نه، كو ئێك ژوان یێ درێژ بوو، هه‌روه‌سا وه‌ك ئه‌كته‌ر ژی د چه‌ند فلمان دا كاركریه و ئه‌ڤه پتری بیست سالانه ل وه‌لاتێ هوله‌ندا دژیت.
