پێداچوون د دانانا پیڤه‌رێن ئاڤێ دا دێ هێته كرن
هه‌ولێر، قائید میرۆ:
قانوونا پاراستنا ئاڤێ دێ كه‌ڤیته د بیاڤێ بجهئینانێ دا و بڕیارده‌رێ لژنا باژێڕڤانیان ژی دبێژیت: رێ ناهێته دان هه‌موو جۆره پیڤه‌ره‌كێ ئاڤێ بۆ وه‌لاتیان بهێته گرێدان و ب تنێ ئه‌و كۆمپانیا پیڤه‌ران گرێ دده‌ن یێن ژلایێ وه‌زاره‌تێ ڤه هاتینه په‌سه‌ندكرن.
نزار مه‌لا غه‌فار، بڕیارده‌رێ لژنا باژێڕڤانیان ل په‌رله‌مانێ كوردستانێ بۆ رۆژناما ئه‌ڤرۆ دیار كر، پشتی قانوونا پاراستنا ئاڤێ ژلایێ په‌رله‌مانێ كوردستانێ ڤه هاتیه ده‌رئێخستن ل رۆژناما فه‌رمی هاتیه به‌لاڤكرن و بڕیاره نێزیك بكه‌ڤیته د بیاڤێ بجهئینانێ دا و گۆت: “ئه‌ڤه بۆ جارا ئێكێ یه قانوونه‌ك بۆ پاراستنا ئاڤێ بهێته ده‌رئێخستن و دێ كاریگه‌ری ل سه‌ر پاراستنا ئاڤێ هه‌بیت وه‌ك سامانه‌كێ نیشتیمانی و گرنگ، هه‌روه‌سا دێ بیته ئه‌گه‌ره‌كێ بهێز بۆ پاراستنا كه‌رتێ ئاڤێ ل هه‌رێما كوردستانێ و ئابووری كرن د كه‌رتێ ئاڤێ دا”.
نزار مه‌لاغه‌فار گۆتژی: “بڕیاره پێداچوون د دانانا پیڤه‌ڕێن ئاڤێ دا بهێته‌كرن و ئه‌و پیڤه‌رێن ژلایێ وه‌زاره‌تا باژێڕڤانی نه‌هاتینه په‌سه‌ندكرن نابیت چو كۆمپانیه‌ك ئه‌ڤان پیڤه‌رێن نه‌په‌سه‌ندكری بۆ وه‌لاتیان گرێ بده‌ت، ب تنێ ئه‌و كۆمپانیا دێ ئه‌ركێ گرێدانا پیڤه‌رێن ئاڤێ بجهئینن یێن ژلایێ وه‌زاره‌تێ ڤه مۆهله‌ت هه‌ی، ل سه‌ر كوالێتیا پیڤه‌ران ژی ئه‌م دگه‌ل وه‌زاره‌تا باژێڕڤانی و گه‌شت و گوزار دانوستاندنان دكه‌ین باشترین جۆرێن پیڤه‌ران بۆ وه‌لاتیان بهێنه گرێدان”.
