به‌ربژارا پارتی یا ژماره 23 ئه‌ڤین مزووری:گه‌له‌ك یا گرنگه كه‌سانێن بسپۆر بچنه به‌غدا و ب رێیێن ئه‌كادیمی مافێن كوردان داخواز بكه‌ن
دیدار، نیوار محه‌مه‌دسه‌لیم:
به‌ربژارا ژماره 23 یا پارتی دیموكراتی كوردستان، بۆ جڤاتا نوونه‌رێن عیراقێ، ئه‌ڤین سه‌لیم نوری مزووری، د دیداره‌كێ دا بۆ رۆژناما ئه‌ڤرۆ به‌حس ل به‌رنامه و كارێن خوه یێن پاشه‌رۆژه رۆژێ دكه‌ت. دده‌ته زانین ژی كو چوونا نوونه‌رێن كورد بۆ به‌غدا مافه و گه‌له‌ك یا گرنگه چونكو جهێ دارێژتنا بڕیار و قانوونایه. دده‌ته زانین ژی كو به‌رقراربوونا سیاسی ل عیراقێ نینه، دا كو عیراقی ئارام ببیت پێدڤیه ده‌ستێوه‌ردانێن هه‌رێمی و ئه‌قلیمی نه‌مینن و كار ب ئه‌رك و مافان و ب جهئینانا دستووری بهێته كرن.
ئه‌ڤرۆ: د. ئه‌ڤین مزووری كی یه؟
ئه‌ڤین مزووری: ئه‌ز مامۆستا زانكۆیێ پرۆفیسورا هاریكار ئه‌ڤین سه‌لیم نوری مزووری مه، به‌ربژارا پارتی دیموكراتێ كوردستان یا ژماره 25 بۆ جڤاتا نوونه‌رێن عیراقێ.
ناسناڤێ منێ زانستی پرۆفیسورا هاریكارم جهێ كارێ من ل په‌یمانگه‌ها ته‌كنیكی یا دهۆكێ یه، ل سالا 2014 هه‌تا 2017ێ سه‌رۆك پشكا كارگێری كار، په‌یمانگه‌ها ته‌كنیكی كارگێری بووم، سالا 2017 سه‌رۆك پشكا كارگێری كار ل كولیژار كارگێری كار بووم. ل سالا 2017ێ هه‌تا 2018ێ هاریكارا راگرێ كولیژا ته‌كنیكی كارگێری دهۆك بووم، ل سالا 2019ێ هاریكارا راگرێ په‌یمانگه‌ها ته‌كنیكی دهۆك بووم. نها ژی وه‌كو مامۆستا كار دكه‌م ل په‌یمانگه‌ها ته‌كنیكی دهۆك ل زانكۆیا پۆلیته‌كنیك.
ئه‌ڤرۆ: مه‌ره‌ما ته ژ چوونا به‌غدا وه‌كو نوونه‌ره‌ك ل جڤاتا نوونه‌ران چیه؟
ئه‌ڤین مزووری: مه‌ره‌ما من به‌رده‌وامی دانه ب خه‌باتێ دیسان ببم ده‌ست كه‌فته‌ك بۆ ب ده‌ست ڤه ئینانا هه‌موو مافێن ره‌وا و یێن دستووری یێن هه‌رێمێ ل عیراقا فیدرال، ئه‌ز وه‌كو مامۆستا زانكۆیێ بسپۆریا من ل سه‌ر بابه‌تێن دارایی كاگێری زۆر یا گرنكه بۆ خه‌لكێ كوردستانێ ل جڤاتا نوونه‌رێن عیراقێ كه‌سانێن ئه‌كادیمی هه‌بن بۆ ب ده‌ست ڤه ئینانا مافێن ڤی خه‌لكی.
ئه‌ڤرۆ: به‌رنامێ ته یێ پاشه‌رۆژێ چیه؟ هه‌كه هات و خه‌لكی باوه‌ری دا ته؟
ئه‌ڤین مزووری: پارتی به‌رنامه‌كێ نشتمانی یێ هه‌یی بۆ نوونه‌ران ل جڤاتێ هه‌ر ئێك ب گوره‌یی بسپۆریا وی كو ئارمانجێن نشتمانی نه، ئه‌م وه‌ك نه‌خشه كار ل سه‌ر دكه‌ین، دیسان ب رژدی به‌رده‌وامیێ دده‌ینه وان خالێن هاتینه ده‌ست نیشان كرن یا پێدڤی گله و گازندێن ڤی خه‌لكی ئه‌ز وه‌كو نوونه‌را هه‌رێمێ بگه‌هینم مه‌لبه‌ندێ دارشتنا قانوون و رێنمایێن ڤی وه‌لاتی بۆ چاره‌سه‌ركرنا وان ئاریشان.
ئه‌ڤرۆ: د ناڤ به‌رنامێ پارتی دا تو دێ گرنیگێ ده‌یه كیش بڕگان و ل سه‌ر كیشكان كار كه‌یی؟
ئه‌ڤین مزووری: پارتی دیموكراتی كوردستان وه‌كو ئێك ژ كه‌ڤنترین پارتیێن سه‌ر ئاستێ عیراقێ، یا دیاره هه‌ر ژ دامه‌زرادنێ و هه‌تا نها یا رژد بوویه ل سه‌ر ب ده‌ستڤه‌ئینانا مافێن هه‌موو خه‌لكێ عیراقێ و هه‌رێما كوردستانێ بێ جوداهی ل سه‌ر بنه‌مایێ دستووری. نها ژی كاراكته‌ره‌كێ گرنگه د پرسێن نشتیمانی یێن عیراقی دا. پارتی یا سه‌لماندی كو حوكمرانی ل بن سیبه‌را وێ به‌رقه‌راربوونا سیاسی یه و ئارامی و ئه‌من بۆ وه‌لاتی و وه‌لاتیان. ئه‌م دێ د هه‌لبژارتنێن داهاتی دا، د پێناڤی به‌رفره‌هكرنا ده‌وله‌تا مه‌ده‌نی و دیموكراسی و فیدرالی دا پشكداریێ كه‌ین ل سه‌ر بنه‌مایێ پارڤه‌كرنه‌كا دادوه‌رانه یا ده‌سته‌لات و سامانان. هه‌روه‌سا ب ده‌ستڤه‌ئینانا ده‌رفه‌تان ب وه‌كهه‌ڤی بۆ هه‌موویان د پێناڤی ئاڤاكرنا ده‌وله‌تا دامه‌زراوه‌یی و قانوون و پابه‌ندبوون ب دستووری.
دیسا زێده‌تر دێ گرنكیێ ده‌مه كارێن دارایی و كارگێری ل دووڤ بسپۆریا خوه ب تایبه‌ت كار كرن ل سه‌ر بوودجێ هه‌رێما كوردستانێ دیسان هه‌ر كاره‌كێ د به‌رژه‌وه‌ندیا خه‌لكێ كوردستانێ و پلانا نشتمانی دا.
ئه‌ڤرۆ: چه‌ند یا گرنگه ئه‌ڤرۆ بچینه به‌غدا؟
ئه‌ڤین مزووری: ژبلی گرنگیێ ئه‌ڤه مافه مه نوونه‌ر ل به‌غدا هه‌بن چونكو به‌غدا بنگه‌هێ بڕیارێ یه و مه‌لبه‌ندێ كۆمكرنا بڕیارێن چاره‌نڤیس ساز یێن هه‌موو خه‌لكێ عیراقێ یه ل گه‌ل هه‌رێما كوردستانێ ژی چونكو هه‌موو بڕیار و قانوونێن و چاره‌نڤیسیێن ڤی خه‌لكی ژ به‌غدا ده‌ردكه‌ڤن ژ به‌ر هندێ ئاماده بووونا مه وه‌كو نونه‌رێن هه‌رێمێ د ناڤا جڤاتا نوونه‌رێن عیراقێ دا مافێ مه‌یه دیسان نوونه‌رێن ب هێز دێ گرنگیێ ئیننه به‌رچاڤ بۆ داخواز كرن و به‌رگریكرنه‌كا ب هێز ژ مافێن خه‌لكێ كوردستانێ.
ئه‌ڤرۆ: چه‌ند یا گرنگه ل به‌غدا د ئێكگرتی بین؟
ئه‌ڤین مزووری: ئێكگرتن خالا سه‌ركه‌فتی یه هه‌رده‌م پارتی بوویه ئه‌و ئێكگرتنه پاراستی.
بێ گومان هێزا مه وه‌ك كورد د ئێكگرتن و ریكخستنا مه دایه ئه‌ڤ په‌رت و به‌لایا د ناڤ گه‌له‌ك پارتیان دا هه‌یی یا دبیته ئه‌گه‌رێ لاوازبوونا وان ژ به‌ر كو زۆر جاران قانوون و رێنمایێن ده‌ركه‌ڤن ب پتریا ره‌ها ده‌ردكه‌ڤن ژ به‌ر هندێ ژی چه‌ند ئه‌م كورد د ئێكگرتی بین د ناڤا جڤاتا نوونه‌رێن عیراقێ دا، پتر دێ شێین مافێن ڤی خه‌لكی ب ده‌ست ڤه ئینین.
ئه‌ڤرۆ: تو دبینی دێ پارتی هه‌ر شێت بیته پارتا ئێكێ ل سه‌ر ئاستێ عیراقێ و بۆچی؟
ئه‌ڤین مزووری: هه‌لبژارتنێن چوویی وه‌كو پارتێن سیاسی، پارتی پارتا ئێكانه بوو د سه‌ركه‌ڤتنێ دا د ئه‌ڤان هه‌لبژارتنان دا ژی ئه‌م دبینین پارتی د پێشڤه‌چوونێ دایه نه پاشڤه‌چوونێ و ب ئانه‌هیا خودێ دێ سه‌ركه‌فتن یا د به‌رنامه‌یێ خوه دا ئینایی چ ل سه‌ر ئاستێ هه‌رێمێ بیت یان به‌غدا بێ گومان ئه‌ڤه ژی بۆ جه‌ماوه‌رێ پارتی دزڤریت.
ئه‌ڤرۆ: ئه‌و چ تشته ل ده‌ف پارتی هه‌یی خه‌لك وێ باوه‌ریێ بده‌تێ؟
به‌رقراربوونا سیسته‌مێ سیاسی یێ پارتی، مێژوویا پڕ سه‌روه‌ریا پارتی، رێبازا دومدرێژ و رێژتنا خوین و رۆندكا ل ده‌مێن به‌رته‌نگاڤیا دا ژ بۆ خاترا ڤی ملله‌تی، سیاسه‌تا حه‌كیمانه و سه‌نگێ سه‌رۆك بارزانی یێن شیایی زێده‌تر باوه‌ریێ بۆ ڤی خه‌لكی دروست بكه‌ن و زێده‌تر پشته‌ڤانیا ڤێ پارتێ بهێته كرن. هه‌روه‌سان رژدیا سه‌رۆك بارزانی ل سه‌ر هه‌لویستێ كوردایه‌تی ومروڤایه‌تیێ.
ئه‌ڤرۆ: پێشبینیێن ته بۆ عیراقا داهاتی چنه؟
ئه‌ڤین مزووری: عیراقا داهاتی و نوكه ژی به‌رده‌وام گورانكاری هه‌نه ژ هه‌موو لایه‌نان ڤه، ئه‌ڤ هه‌بوونا گه‌له‌ك پارتا كارتێكرن هه‌یه و دێ د خراب بن چونكو به‌رقه‌راربوون تێدا یا كێمه و ده‌ستێوه‌ردان و كارتێكرن هه‌نه كو پێدڤی ب جڤاكێ نێڤده‌وله‌تیه، به‌لێ وه‌كو كورد د عیراقا داهاتی دا پله و پایه د باشن و عیڕاق پێدڤی ب به‌رقه‌راربوونا سیاسی یه و ده‌ست تێوه‌ردان كێم ببن دا داهاته‌یكێ باش هه‌بیت.
ئه‌ڤرۆ: باشترین چاره‌سه‌ری بۆ ره‌وشا نها ل عیراقێ هه‌یی چیه؟
ئه‌ڤین مزووری: جڤاتا نوونه‌ران ب تنێ نه‌شێت كێشه‌یا چاره‌سه‌ر بكه‌ت چونكو كێشه‌یێن عیراقێ گه‌له‌كن یێن به‌رێ 2003ێ هه‌تا نوكه خه‌لكێ عیراقێ باجێ دده‌ت نها ژی وه‌لاتیێن عیراقێ و وه‌لاتی پاشه‌رۆژه‌كا دیار نینه، له‌ورا چاره‌سه‌ری پلان و پروگرامێن د به‌رژه‌وه‌ندیا خه‌لكی دانه دوور ژ ده‌ست تێوه‌ردانێن هه‌رێمێ و نێڤده‌وله‌تی و ده‌ستور بهێته بجهئینان، ژیانا خه‌لكی ب گوره‌یی مافان دروست بیت.
ئه‌ڤرۆ: ل دووماهیێ ته دڤێت چ بێژی؟
ئه‌ڤین مزووری: ده‌م ده‌مێ مافانه. ئێدی هه‌ر تشت روهن و ئاشكرا بوویه، له‌ورا دبێژم هه‌ر كه‌سێ ببیته نوونه‌رێن ڤی خه‌لكی مافێن وان دابین كه‌ت خوه ماندوو بكه‌ت ب رژدی كار بكه‌ت ب ئانه‌هیا خودێ هێز و شیانا بده‌ت ب هه‌ممو هێز و رژدیه‌ت دێ پشكه‌ك ژ چاره‌سه‌ر كرنا كێشێن كوردستانێ و خه‌لكێ خوشتڤی بین.
