پارێزگارێ دهۆكێ دگه‌ل لژنا بلندا ئێمناهیێ ل دۆر هه‌لبژارتنان كۆمبوو
ئه‌ڤرۆ:
د. عه‌لی ته‌ته‌ر، پارێزگارێ دهۆكێ دوهی 12/9/2021 سه‌رپه‌رشتیا كۆمبوونا لژنا بلندا ئێمناهیێ ل پارێزگه‌ها دهۆكێ ل دۆر هه‌لبژارتنان كر.
د كۆمبوونێ دا پارێزگارێ دهۆكێ دوپاتی ل سلامه‌تیا ب رێڤه‌چوونا پرۆپاگه‌ندا هه‌لبژارتنان بێی جوداهی كر و راگه‌هاند: “پێدڤیه ده‌رفه‌تێن یه‌كسان د پرۆپاگه‌ندێ دا بۆ هه‌موو به‌ربژاران بهێته ره‌خساندن، كارێن نه‌یاسایی و زێده‌گاڤی د پرۆسا هه‌لبژارتنان دا ژ ده‌رڤه‌ی رێنمایێن كۆمسیونێ بهێنه راكرن”.
پارێزگارێ دهۆكێ لایه‌نێن په‌یوه‌ندیدار راسپاردن كو هه‌موو بزاڤان بكه‌ن پرۆسه‌یه‌كا مه‌ده‌نی و زه‌لال و بێی زێده‌گاڤی بهێته ئه‌نجامدان، پاشی گۆهداریا پێشنیار و تێبینیێن به‌رهه‌ڤبوویێن كۆمبوونێ كر و د دووڤ دا د كۆنگره‌كێ رۆژنامه‌ڤانی دا ده‌رئه‌نجامێن كۆمبوونێ بۆ ده‌زگه‌هێن راگه‌هاندنێ دیاركرن.
دیسا هه‌ر دوهی د. عه‌لی ته‌ته‌ر، پارێزگارێ دهۆكێ سه‌را پشكا ده‌رئێخستنا ده‌ستووریێن هاژۆتنا ترۆمبێلان ل رێڤه‌به‌ریا هاتنوچوونا پارێزگه‌ها دهۆكێ ل دومیز دا و ژلایێ عه‌مید ئیبراهیم عه‌گید، رێڤه‌به‌رێ هاتنوچوونێ و ئه‌فسه‌رێن رێڤه‌به‌ریێ پێشوازی لێ هاته كرن.
پارێزگارێ دهۆكێ ژ نێزیك سه‌حكره گوره‌پانا ترایێ، ده‌مێ وه‌لاتی تاقیكرنا ترایێ ئه‌نجام دده‌ن و داخوازا سه‌ركه‌فتنێ بۆ هه‌موو پشكداران كر و ته‌كه‌زی ل سه‌ر بجهئینانا یاسا و رێنمایێن هاتنوچوونێ كر.
پاشی پارێزگارێ دهۆكێ سه‌را هولا تاقیكرنێن پله‌بلندكرنا ئه‌فسه‌رێن هێزێن ئێمناهیێ دا و ژ نێزیك سه‌حكره ئه‌فسه‌رێن هێزێن ئێمناهیێ ده‌مێ تاقیكرنان ئه‌نجام دده‌ن و هیڤی خواست كو بشێن ب ئاسته‌كێ باشتر كار و خزمه‌تا وه‌لاتیان بكه‌ن.
هه‌ژی گوتنێ یه پله‌یێن 89 ئه‌فسه‌رێن هێزێن ئێمناهیا ناڤخوه‌یی پشتی تاقیكرنێ دێ هێنه بلندكرن.
