كاره‌با نشتیمانی بۆ جارا ئێكێ دگه‌هیته هه‌ژماره‌كا گوندێن قه‌زا ئامێدیێ
ئامیدیێ، مه‌حموود نهێلی:
هه‌ژماره‌كا پرۆژێن گرنگێن كاره‌بێ ل سنوورێ قه‌زا ئامێدیێ دهێنه بجهئینان و كاره‌با نشتیمانی بۆ جارا ئێكێ یه دگه‌هیته پێنج گوندێن سنوورێ وێ قه‌زایێ.
ئه‌ندازیار ئارام جه‌لال، رێڤه‌به‌رێ به‌لاڤكرنا كاره‌با قه‌زا ئامێدیێ بۆ رۆژناما ئه‌ڤرۆ دیار كر، نوكه هه‌ژماره‌كا پرۆژێن كاره‌بێ د وارێ بجـهـئینانێ نه و هنده‌ك ژ وانا ژی ب دووماهی هاتینه و گۆت: “ل ناحیا بامه‌رنێ پرۆژێ گه‌هاندنا هێلا كاره‌بێ بۆ مالێن نوو هاتینه ئاڤاكرن ل گوندێ شێخ مه‌ما و گوندێ ته‌حلاڤا و سه‌خبێركرنا هێلا كاره‌با گوندێ ئه‌ره‌دنا ب گوژمێ 83 ملیۆن دیناران دهێته بجهئینان”.
ناڤهاتی دیار ژی كر، ل سه‌نته‌رێ قه‌زا ئامێدیێ ژی پرۆژێ ته‌مامكرنا روناهیا جاددا گشتی ل مرێبكا و دانانا هه‌ژماره‌كا گوهۆركان ل تاخێ نوو و گه‌هاندنا هێلا كاره‌بێ بۆ چه‌ند مالان ل سپیندارا خه‌لفۆ ب گوژمێ 283 ملیۆن دیناران دهێنه بجهئینان و گۆت: “ل ناحیا چه‌مانكێ ژی گه‌هاندنا هێلا كاره‌بێ بو گوندێن ملبركێ و شكه‌فتێ و بلمباسا و مسه‌له‌كا گری دهێته راكێشان ب گوژمێ 206 ملیۆن دیناران”.
ناڤهاتی ئاشكرا ژی كر، د بجهئینانا ڤان پرۆژان دا هه‌ژماره‌كا گوندان بۆ جارا ئێكێ ب كاره‌با نشتیمانی دێ هێنه رۆهنكرن.
