عومه‌ر ئۆره‌ی: پشكداریا وه‌لاتیان د هه‌لبژاتنان دا وه‌كو سه‌نگه‌رێ شه‌ڕیه
ئامێدیێ، مه‌حمود نهێلی:
عومه‌ر ئۆره‌ی، به‌رپرسێ لقێ 18 یێ پارتی دیموكراتی كوردستان ل ئامێدیێ دیار كر، بابه‌تێ پشكداریكرنا وه‌لاتیان د هه‌لبژارتنان دا وه‌كو بابه‌تێ شه‌ڕیه، وه‌كو چاوا هه‌ر پێشمه‌رگه‌یه‌ك ل سه‌نگه‌ره‌كی به‌رڤانیێ ل ئاخا وه‌لاتی دكه‌ت و ب كێمبوونا هه‌ر پێشمه‌رگه‌یه‌كی كارتێكرنه‌كا نه‌رێنی ل سه‌ر وی سه‌نگه‌ری دێ كه‌ت، بابه‌تێ پشكداریكرنا وه‌لاتیان ژی د هه‌لبژارتنان دا ب ڤی ره‌نگی یه.
به‌رپرسێ لقێ 18 یێ پارتی ل ئامێدیێ د سمیناره‌كێ دا بۆ هه‌ژماره‌كا ریهسپی و كه‌سایه‌تی و هه‌لبژێر و وه‌لاتیێن كۆمه‌لگه‌ها قه‌دش ل باره‌گایێ رێكخراوا قه‌دش، به‌حسی پرۆسا هه‌لبژارتنان و گرنگیا سه‌ركه‌فتنا پارتی و به‌ربژارێ ده‌ڤه‌رێ یێ هه‌ژماره 27 كر و گوت: “پشكداری نه‌كرن د هه‌لبژارتنان دا، دێ بیته ئه‌گه‌ر پێگه‌هێ هه‌رێمێ لاواز ببیت و ئاریشێن مه ژی دێ زێده‌تر لێبهێن، چونكو پشكداری نه‌كرنا مه خه‌مساریه به‌رامبه‌ر نه‌ته‌وا مه، نه‌ك چ كه‌س و به‌ربژار و به‌رپرسان”.
گوتژی: “ده‌نگێن مه به‌ری بۆ هه‌ر به‌ربژاره‌كی یان پێكهاته‌كێ بن بۆ پارتی و سه‌رۆك بارزانی نه، به‌ربژارێ مه به‌ربژارێ پارتی و سه‌رۆك بارزانی یه، نه‌یێ هه‌ر پێكاهاته‌كێ یان عه‌شیره‌ته‌كێ یه، مه‌زنترین پێكهاتا مه پێكڤه گرێ دده‌ت حزبا مه یه و رێبازا مه‌یه، ژ به‌ر هندێ د بێژم: پێدڤیه ئه‌م ڤێ خالێ ل به‌ر جاڤ بگرین”.
عومه‌ر ئۆره‌ی، به‌رپرسێ لقێ 18 یێ پارتی دیار ژی كر، دڤێت ئه‌م د ڤان هه‌لبژارتنان دا به‌رژه‌وه‌ندا بلندا حزب و نه‌ته‌وه و ملله‌تێ خوه ل به‌رجاڤ بگرین و گوت: “ده‌نگدان به‌ری كو ئه‌رك بیت مافێ هه‌ر كه‌سه‌كی یه، مه پێ خوه‌شه چ ئه‌ندامێن مه خوه ژ ڤی مافی بێ به‌هر نه‌كه‌ن”.
