پارێزگارێ دهۆكێ: ب گوژمێ 300 ملیار دیناران پرۆژه ل ئامێدیێ دهێنه بجهئینان
ئامێدیێ، محمود نهێلی:
د سه‌ره‌دانه‌كێ دا بۆ ده‌ڤه‌رداریا ئامێدیێ دكتۆر عه‌لی ته‌ته‌ر، پارێزگارێ دهۆكێ به‌رێ بنیاتی بۆ هه‌ژماره‌كا پرۆژان دانا و د كۆنگره‌كێ رۆژنامه‌ڤانی دا دیار كر، نوكه ب بهایێ 300 ملیار دیناران پرۆژه ل سنوورێ ده‌ڤه‌رداریا ئامێدیێ دهێنه بجهئینان و هنده‌ك ژ وان ژی ب دووماهی هاتینه و كه‌ڤتینه د خزمه‌تا وه‌لاتیان دا.
د. عه‌لی ته‌ته‌ر، پارێزگارێ دهۆكێ ل رۆژا 30/9/2021 ب هه‌ڤالینیا شانده‌كی سه‌را ده‌ڤه‌رداریا ئامێدیێ دا و ژلایێ وارشین سه‌لمان، قایمقامێ قه‌زا ئامێدیێ و رێڤه‌به‌رێن ناحیێن سه‌ر ب قه‌زایێ و رێڤه‌به‌رێن فه‌رمانگه‌هێن میری پێشوازی لێ هاته كرن، پاشی ب هه‌ڤڕا سه‌را خێزانێن ئاكنجی د كۆمه‌لگه‌ها گه‌شتیاری یا سكه‌ی ل سیلاڤێ دا و ئاشكرا كر، سه‌رۆكێ حوكمه‌تا هه‌رێما كوردستانێ رازیبوونا خوه دیار كریه ل سه‌ر قه‌ره‌بووكرنا ڤان خێزانان و ئه‌ڤ كۆمه‌لگه‌هه دوباره بهێته نووژه‌نكرن و چێكرن و بۆ مه‌ره‌ما گه‌شتیاری مفا ژێ بهێته وه‌گرتن.
پاشی پارێزگارێ دهۆكێ و شاندێ د گه‌ل دا به‌رێ بنیاتی بۆ هه‌ژماره‌كا پرۆژێن خزمه‌تگۆزاری دانا، ژ وان ژی: چێكرنا رێكێن ناڤخوه‌یی ل گوندێن (مرێبكا، بێبادێ، گه‌هاندنا كاره‌بێ بۆ رۆهنكرنا جادا گشتی ل سه‌نته‌رێ ئامێدیێ، سه‌خبێریكرنا رێكێن ناڤخوه‌یی ل تاژیكا، مرێبكا، بانیێ، پیرۆزانا، هه‌ڤندكا و به‌ربانگێ)
د. عه‌لی ته‌ته‌ر، پارێزگارێ دهۆكێ د كۆنگره‌كێ رۆژنامه‌ڤانی دا دیار كر كو حوكمه‌تا هه‌رێما كوردستانێ رازیبوونا خوه ل سه‌ر مه‌زاختنا پتر ژ 32 ملیار دیناران بۆ ئه‌نجامدانا هه‌ژماره‌كا پرۆژێن دیتر ل ده‌ڤه‌رێ دیاركریه و گۆت: “نوكه ب گوژمێ 13 ملیار دیناران به‌رێ بنیاتی بۆ هه‌ژماره‌كا پرۆژان ل ده‌ڤه‌رێ هاته دانان كو ژ چێكرنا رێكا ئامێدیێ بۆ كانی ماسێ و ئاڤاكرنا قوتابخانه‌یه‌كا 12 رێزی ل مرێبكا و چاره‌سه‌ركرنا ئاریشه‌یا ئاڤا بامه‌رنێ و كاره‌با ناحیا شێلادزێ پێك دهێن، دیسا حوكمه‌تا هه‌رێمێ ل سه‌ر بجهئینانا پرۆژان ل ده‌ڤه‌رێ دێ یا به‌رده‌وام بیت”.
