كومسیۆن: 74 سكالا ل سه‌ر ده‌نگدانا تایبه‌ت و گشتی هاتینه تۆماركرن
ئه‌ڤرۆ:
كومسیۆنا بلندا سه‌ربخوه یا هه‌لبژارتنان ل ئیرقێ دیار كر، 74 سكالا ل سه‌ر پرۆسا ده‌نگدانا تایبه‌ت و گشتی د هه‌لبژارتنێن به‌روه‌خت یێن ئیراقێ دا هاتینه تۆماركرن.
جومانه غه‌لای، په‌یڤدارا كومسیۆنا بلندا سه‌ربخوه یا هه‌لبژارتنان ل ئیرقێ دوهی 11/10/2021 د داخویانیه‌كا رۆژنامه‌ڤانی دا خویا كر، ئه‌وێن مافێ تۆماركرنا سكالا هه‌ی ژ ده‌نگده‌ر، به‌ربژار، بریكارێن حزبان و هه‌ڤپه‌یمانان پێك دهێن و گۆت: “سكالا ژی ل نڤیسینگه‌ها سه‌ره‌كی یا كومسیۆنا بلندا سه‌ربخوه یا هه‌لبژارتنان ل به‌غدا یان ل ده‌سته‌یا هه‌لبژارتنان ل هه‌رێما كوردستانێ یان نڤیسینگه‌هێن هه‌لبژارتنان و ناڤه‌ندێن تۆماركرنێ و ناڤه‌ندێن ده‌نگدانێ ل پارێزگه‌هان دهێنه تۆماركرن و هه‌تا نوكه 74 سكالا هاتینه تۆماركرن”.
گۆتژی: “ئه‌و هه‌ژمارا سكالایان یێن هاتینه تۆماركرن، ژ رۆژا ده‌نگدانا تایبه‌ت و گشتی هه‌تا دووماهیا ده‌واما فه‌رمی یا كومسیۆنێ نه ل رۆژا 11/10/2021″.
ئه‌ڤه د ده‌مه‌كی دایه، كومسیۆنا بلندا سه‌ربخوه یا هه‌لبژارتنان ل ئیرقێ دوهی د راگه‌هاندنه‌كێ دا رێژا پشكداریا وه‌لاتیان د هه‌لبژارتنان دا ل سه‌ر ئاستێ هه‌موو پارێزگه‌هێن ئیراقێ و هه‌رێما كوردستانێ به‌لاڤ كر و راگه‌هاند: 22 ملیۆن و 116 هزار و 368 كه‌سان، ناڤێن وان د تۆمارا ده‌نگده‌ران دا هاتبوو تۆماركرن، دیسا ب پشتبه‌ستن ل سه‌ر 94% یا وان بنگه‌هێن ده‌نگدانێ كو ئه‌نجامێن وان هاتینه وه‌رگرتن، ژ وێ هه‌ژمارێ 9 ملیۆن و 77 هزار و 779 كه‌سان د هه‌لبژارتنان دا ده‌نگێ خوه دایه.
ل دۆر سكالایان ژی كومسیۆنێ دیار كر، د پرۆسا ده‌نگدانا تایبه‌ت دا 16 سكالا و د پرۆسا ده‌نگدانا گشتی ژی دا 58 سكالا هاتینه تۆماركرن، ئه‌و سكالایێن ل هه‌رێما كوردستانێ و ده‌ڤه‌رێن كوردستانی یێن ده‌رڤه‌ی ئیدارا هه‌رێما كوردستانێ هاتینه تۆماركرن، ئه‌ڤه‌نه: ل پارێزگه‌ها دهۆكێ 7 سكالا، هه‌ولێرێ 6 سكالا و سلێمانیێ 11 سكالا هاتینه تۆماركرن، لێ چو سكالا ل پارێزگه‌هێن كه‌ركووك و نه‌ینه‌وا نه‌هاتینه تۆماركرن.
