چاڤدێره‌ك: كورد ژ روودانێن د ناڤبه‌را ئیرانێ و ئازه‌ربایجانێ دا دلگرانن
ئه‌ڤرۆ، هۆشه‌نگ تاجر:
محه‌مه‌د حاجی زاده چاڤدێرێ سیاسی یێ رۆژهه‌لاتێ كوردستانێ ژ باژێرێ ماكو یێ رۆژهه‌لاتێ كوردستانێ بۆ ئه‌ڤرۆ دیار كر كو ئیرانێ چه‌كێن گران و هێزه‌كا زێده ل سه‌ر سنۆرێ خوه یێ ل گه‌ل ئازه‌ربایجانێ كۆم كریه، ب سه‌دان تانك، فرۆكێن شه‌ری، چه‌كێن گران ل سه‌ر سنۆری هاتینه بجهكرن و خه‌لكێ ده‌ڤه‌رێ دترسن كو شه‌ره‌ك د ناڤبه‌را هه‌ر دو وه‌لاتان دا روو بده‌ت.
چاڤدێرێ سیاسی دیار كر هه‌كه شه‌ر د ناڤبه‌را ئیرانێ و ئازه‌ربایجانێ دا روو بده‌ت دێ پشكه‌ك ژ ئاخا رۆژهه‌لاتێ كوردستانێ ب تایبه‌تی ژی باكورێ پارێزگه‌ها ئورمیێ دێ بیته مه‌یدانا شه‌ری و دێ زیانه‌كا مه‌زن گه‌هیته خه‌لكێ سڤیل، ژ به‌ر هندێ ژی وه‌لاتی گه‌له‌ك دترسن كو شه‌ر د ناڤبه‌را ئیرانێ و ئازه‌ربایجانێ دا روو بده‌ت.
چاڤدێرێ سیاسی ئه‌و یه‌ك ژی دیار كر كو به‌رپرسێن ئیرانێ دبێژن ئازه‌ربایجان هاریكاریا ئسرائیلێ دكه‌ت و ئسرائیل ئاخا ئازه‌ربایجانێ ل دژی ئیرانێ بكار دئینیت و سیخورێن ئسرائیلێ ب رێیا ئازه‌ربایجانێ ده‌ربازی ئیرانێ دبن و كریارێن تیرۆرستی ئه‌نجام دده‌ن، ژ به‌ر هندێ ژی نها ئیرانێ هێزه‌كا مه‌زن ل سه‌ر سنۆری كۆم كریه و فه‌رماندارێن ئیرانێ رۆژانه گه‌فان ل ئازه‌ربایجانێ دكه‌ن.
