وەرزشڤانێن دێرین هەلگرێن دیرۆكا زێڕینن
محەمەد عەلی نوری
دەما بابەت ل سەر وەرزشڤانێن دێرین بهێتە نێڤێسین دێ گەلەك ب زەحمەت بیت ئەم گۆتارەكێ یا ڕاپۆرتەكێ دناڤا لاپەرەك یا دو لاپەرێن رۆژنامەیێ دا بەحس ل سەر بكەین، ژبەركو دیرۆكەكا درێژ و پری خزمەت دناڤا وەرزشێ دا هەیە، مەرەما مەژی نەبتنێ بەحس ل یارییەكێ بەلكو گەلەك جورێن یاریان هەنە كو كاروانەكێ پری خزمەت و دەستكەفت هەنە.
هەلبەت هەكە ئەم ڤەگەڕینە وەرزشا پارێزگەها دهۆكێ كو پری دەستكەفتە ئەوا هاتیە نڤێسین ژبلی ئەوان یاریێن كوردەواری كو هەر ل سەر دەمێ باب و باپیرێن مە ل چەرخێ 20ێ و بن دا وەرزش بوویە لایەنەكێ گرنگ رۆژانە دهاتە ب كارئینان، تیشكا مە دێ بەحس ل دەستپێكا وەرزشێ و هەتا بەری چەندین سالان كەین كۆ كۆمەكا مەزن یا وەرزشڤانێن دێرین خودان دەستكەڤت بۆ ناڤێ پارێزگەهێ و كوردستانێ هەتا ئیراقێ ژی ئیناینە، هەكە دیرۆكێ ڤەكەین وەرزش ب دروستی ل سالێن پێنجییان و پێهەل قووناغ قووناغ هاتیە پێش كو دەستپێكا وان تیمێن مللی و قوتابخانە بوون، پێنگاڤا ئێكێ هاتبوو هاڤێتن ژ یاریێن گۆرەپانێ، فوتبۆل، تەپا مێزێ، باسكێت بۆل، ڤۆلی بۆلێ، لەشجوانی، یاریێن هێزێ و گەلەكێن دی، دەهان یاریزان و ڕاهێنەرێن بناڤودەنگ مە هەنە، هەرچەندە لیستەیا ناڤان گەلەكن لێ د فوتبۆلێ دا هەموو جاران ناڤێ ڕەحمەتی نعمەت مەحموود و ئەمیر عەبدولعەزیز ل سەرێ لیستێ یە وەكو نموونەیا وەفاداریێ و خۆراگریێ.
پێنەڤێت وەرزش نە بتنێ ب ناسناڤان دهێتە هەلسەنگاندن، بەلكو ب چیرۆكێن ئەوان وەرزشڤانێن پێتشر یێن شیاین ددەمێ خوە دا دیرۆك و دەستكەڤتان تۆماربكەن، ئەوێن د كاروانەكێ پری زەحمەت و ئاستەنگ دا دەربازكرین تایبەت ئەوێن ددەمەكی دا حوكمەتێن ئیراقێ یێن وی وەختی زولم و زوورداری ل سەر گەلێ مە دكرین، ژلایەكێ دووڤە بارێ دارایی یێ باش نەبوو هەروەكو مە وەرزشڤانێن دێرین ڤەگوهاستیە، سەرباری ئەڤان ئاستەنگا بەردەوام بووینە ب سۆزداری و نفش بۆ نفشی دەربازكرینە هەتا ئەڤرۆ گەهشتینە وێ ئاستی مە یانەیێن كوردستانی د خولێن مەزنە یێن ئیراقێ دا هەبن دیسان پشكداریێن د قارەمانیێن دەرڤە ژی دا بكەن، هەروەسان یاریزانێن مە ل سەر ئاستێ ئیراقێ و نێڤدەولەتی دا پشكداربن و ئێكەم بن و نموونە د زوورن.
یا جانە هێشتا دساخ ڕێزگرتنا وان ب دانا دەستەكێ گۆلان یان مێڤانداریەكا تایبەت هەبیت، لێ باشتر ئەوە وەرگرتنا شارەزاهی و بووچوونێن وان وەكو شیرەتكاری یان ڕاهێنەر، هەرچنەبیت دێ هزرەكا ب سەربۆر هەبیت، هەروەسان پشتەڤانییا وان بهێتە كرن دەمێ تیمەكا دێرینان ژی بهێتە دروستكرن وەكو وەفاداریەك بۆ كاروانێ وان، مانا واند دناڤا ناڤەندێن وەرزشی دا ڕێزگرتنە بۆ كاروانێ وان یێ درێژ و دیرۆكا زێڕین، ڕێزگرتنە ل بوهایێ وەرزشا پارێزگەهێ.