ئه‌لمانیا هه‌ڤكاریا پارێزگه‌ها دهۆكێ د وارێ ئاگرڤه‌مراندنێ دا دكه‌ت
ئه‌ڤرۆ:
حوكمه‌تا ئه‌لمانیا فیدرال ترۆمبێلێن ئاگرڤه‌مراندنێ یێن پێشكه‌فتی پێشكێشی پارێزگه‌ها دهۆكێ دكه‌ت و به‌رپرسێن ئه‌لمانیا ژی دبێژن: پێشكێشكرنا ڤان ترۆمبێلان نامه‌یه‌كه كو بێژینه هه‌وه؛ هوون ب تنێ نینن.
د. عه‌لی ته‌ته‌ر، پارێزگارێ دهۆكێ دوهی 19/10/2021 ل باژێرێ توتلینگن ل كۆمارا فیدرالا ئه‌لمانیا د رێوره‌سمه‌كێ فه‌رمی دا ترۆمبێلێن ئاگرڤه‌مراندنێ یێن پێشكه‌فتی ژ پارێزگارێ توتلینگن میشائیل بێك و به‌رپرسێ به‌رگریا شارستانی یا كلاوس فورڤالده‌ر وه‌رگرتن.
د رێوره‌سمێن پێشكێشكرنا وان ترۆمبێلان دا، به‌رپرسێن ئه‌لمانیا راگه‌هاندن: پێشكێشكرنا ڤان ترۆمبێلان نامه‌یه‌كه كو بێژینه هه‌وه؛ هوون ب تنێ نینن، به‌لكو جیهانێ ئاگه‌ه ژ وێ ره‌وشا مرۆڤایه‌تی و رۆلێ قاره‌مانانه یێ شه‌ڕێ تیرۆرێ و ڤه‌حه‌واندنا وێ هه‌ژمارا زۆرا ئاواره و په‌نابه‌ران هه‌یه.
د. عه‌لی ته‌ته‌ر، پارێزگارێ دهۆكێ د رێوره‌سمان دا راگه‌هاند: ئه‌م سۆپاسیا گه‌ل و حوكمه‌تا كۆمارا ئه‌لمانیا فیدرال دكه‌ین كو به‌رده‌وام د گه‌ل مه دا بوویه، ئه‌م یێ كار دكه‌ین سیسته‌مێ ئاگرڤه‌مراندنێ ل پارێزگه‌ها دهۆكێ پێشڤه ببه‌ین و ئه‌ڤه پێنگاڤه‌كا باشه و دێ هاریكاریا مه كه‌ت د ڤی بیاڤی دا.
دیسا هه‌ر ل كۆمارا ئه‌لمانیا فیدرال، بڕیاره ئه‌ڤرۆ رۆژا چارشه‌مبی 20/10/2021 دكتۆر عه‌لی ته‌ته‌ر، پارێزگارێ دهۆكێ وه‌ك ئێكه‌م به‌رپرسێ هه‌رێما كوردستانێ پشكداریێ د كۆنفرانسێ نێڤده‌وله‌تی یێ بودێنسی ئیكونۆمیك ل ئه‌لمانیا بكه‌ت.
د. عه‌لی ته‌ته‌ر، پارێزگارێ دهۆكێ، وه‌كو ئێكه‌م كه‌سایه‌تیێ سیاسی و به‌رپرس د حوكمه‌تا هه‌رێما كوردستانێ دا دێ پشكداریێ د كۆنفرانسێ بودێنسی ئیكونۆمیك ل كۆمارا ئێكگرتی یا ئه‌لمانیا دا كه‌ت كو ل دۆر پلانا ستراتیژی یا ئابوورێ ده‌ڤه‌رێ یه، پارێزگارێ دهۆكێ د كۆنفرانسی دا دێ په‌نه‌له‌كی ل دۆر ره‌وشا ئیراقێ ژلایێ سیاسی و ئابووری كو بۆ جارا ئێكێ یه، ئه‌ڤ په‌نه‌له بۆ كه‌سایه‌تیه‌كێ نه‌ل ئه‌ورۆپا دژیت دهێته رێكخستن، د كۆنفرانسی دا دێ هێته رێكخستن.
