29 سالیا دامه‌زراندنا زانكۆیا دهۆك هاته ساخكرن
ئه‌ڤرۆ، دلڤین ره‌شید:
ب هه‌لكه‌فتا بۆرینا 29 سالان ل سه‌ر دامه‌زراندنا زانكۆیا دهۆك، ب به‌رهه‌ڤبوونا ماجد سه‌ید سالح، نوونه‌رێ پارێزگارێ دهۆكێ و د. سه‌باح ئیبراهیم، نوونه‌رێ وه‌زاره‌تا خواندنا بلند و سه‌رۆكێن زانكۆیێن سنوورێ پارێزگه‌ها دهۆكێ و هه‌ژماره‌كا زانكۆیێن هه‌رێمێ و به‌رپرسێن حزبی و ئیداری، دوهی 31/10/2021 ل هولا كۆنفرانسان رێوره‌سمێن ئاهه‌نگا 29 سالیا دامه‌زراندنا زانكۆیا دهۆك هاتنه گێڕان.
د. داود ئه‌ترووشی، سه‌رۆكێ زانكۆیا دهۆك د په‌یڤه‌كێ دا بخێرهاتنا هه‌موو به‌رهه‌ڤبوویان كر و سوپاسیا وان هه‌موو لایه‌نان كر یێن كو هه‌ر ژ ده‌ستپێكا دامه‌زراندنا زانكۆیا دهۆك بووینه هاریكار و پشته‌ڤان هه‌تا زانكۆ گه‌هشتیه ڤێ قووناغا پێشكه‌فتنێ و گوت: “ل ده‌ستپێكا دامه‌زراندنا زانكۆیا دهۆك، 149 قوتابیان ده‌ست ب خواندنێ كربوو، نوكه پتر ژ 22 هزار قوتابیان ل قووناغێن جودا جودا به‌رده‌وامیێ لێ دده‌نه خواندنێ و پتر ژ هزار و 900 كه‌سان باوه‌رنامێن بلند لێ وه‌رگرتینه”.
دیسا سه‌رۆكێ زانكۆیا دهۆك خواست كو لایه‌نێن په‌یوه‌ندیدار به‌رده‌وام پشته‌ڤانیێ ل زانكۆیا دهۆك بكه‌ن و سۆز دا به‌رده‌وام كار بۆ پێشئێخستنا زانست و زانینێ ل زانكۆیا دهۆك بكه‌ن.
پاشی نوونه‌رێ وه‌زاره‌تا خواندنا بلند د په‌یڤه‌كێ دا پیرۆزباهیا خه‌لكێ پارێزگه‌هێ و هه‌موو مامۆستا و قوتابیان و فه‌رمانبه‌رێن زانكۆیا دهۆك كر و پشته‌ڤانیا وه‌زاره‌تێ بۆ زانكۆیا دهۆك دیار كر.
هه‌ر بڤێ هه‌لكه‌فتێ ماجد سه‌ید سالح، نوونه‌رێ پارێزگارێ دهۆكێ بناڤێ د. عه‌لی ته‌ته‌ر، پارێزگارێ دهۆكێ و كارگێریا پارێزگه‌هێ پیرۆزباهی ل خه‌لكێ پارێزگه‌هێ و مامۆستا و قوتابیان و هه‌موو فه‌رمانبه‌رێن زانكۆیا دهۆك كر و گۆت: “زانكۆیا دهۆك جهێ شانازیێ یه بۆ هه‌موویان، چنكو د كاودانه‌كێ به‌رته‌نگ دا و ب هاریكاریا خه‌مخوران هاتیه ئاڤاكرن و ژ ئه‌نجامێ به‌رهه‌مێ وێ ب هزاران قوتابی هاتینه پێگه‌هاندن و نوكه خزمه‌تا ده‌ڤه‌رێ دكه‌ن، هیڤیدارین كو زانكۆیا دهۆك پتر پێش بكه‌ڤیت و پشته‌ڤانیا پارێزگه‌هێ بۆ هه‌ر هاریكاریه‌كێ دیار كر”.
پاشی په‌نه‌له‌كێ زانستی هاته سازكرن و هه‌ر ئێك ژ مامۆستایان (عسمه‌ت محه‌مه‌د خالد، موئه‌یه‌د ته‌یب، د. ئارمانج، د. داود ئه‌ترووشی و مامۆستا ره‌ند و د.مسلح) پشكداری تێدا كر و دانوستاندن ل دۆر ده‌ستكه‌فتێن زانكۆیا دهۆك یێن د ده‌مێ 29 سالان دا ب ده‌ستڤه هاتین، هاته كرن.
هه‌ژی گوتنێ یه، زانكۆیا دهۆك ل 31/10/1992 هاتیه دامه‌زراندن و ل ده‌ستپێكێ ب تنێ 149 قوتابیان ل كۆلیژا نۆشداری و چاندنێ لێ دخواند، نوكه پتر ژ 30 ده‌زگه‌هێن ئه‌كادیمی و هزار و 700 مامۆستا هه‌نه و پتر ژ 40 هزار قوتابی ژ زانكۆیا دهۆك ده‌ركه‌فتینه و نوكه ژی پتر ژ 22 هزار قوتابی د بیاڤێن جودا جودا دا لێ دخوینن.
