پڕۆژێن خزمه‌تگۆزاری دێ گه‌هنه دو هزار پارچێن ئه‌ردی
شێخان، بارزان مزووری:
سه‌رۆكێ باژێرڤانیا ناحیا قه‌سرۆكێ بۆ رۆژناما ئه‌ڤرۆ دیار كر، به‌ری چه‌ندین ساله زێده‌تری دو هزار پارچێن عه‌ردی ژلایێ حوكمه‌تا هه‌رێما كوردستانێ ڤه ل سه‌ر وه‌لاتی و فه‌رمانبه‌ران ل سنوورێ ناحیا قه‌سرۆكێ ب شێوه‌یه‌كێ فه‌رمی هاتبوونه به‌لاڤكرن، به‌لێ هه‌تا نوكه ژ به‌ر قه‌یرانا دارایی خزمه‌تگۆزاری نه‌گه‌هشتبوونه وان و دبێژیت: نوكه ب شێوه‌یه‌كێ فه‌رمی رێك دێ ب وه‌لاتیان هێته‌دان پارچه ئه‌ردێن خوه ئاڤا بكه‌ن، ئه‌م یێ كار بۆ وێ چه‌ندێ دكه‌ین كو پرۆژێن خزمه‌تگۆزاری بگه‌هینینه وان پارچێن ئه‌ردی.
غه‌یاس محه‌مه‌د، سه‌رۆكێ باژێرڤانیا ناحیا قه‌سرۆكێ خویا ژی كر كو ئاڤاكرنا دو هزار پارچێن عه‌ردی ل سنوورێ باژێرڤانیا وان دێ بیته ئه‌گه‌ر رێژا ئاكنجیبوونێ به‌ره‌ڤ رێژه‌كا مه‌زن بچیت، ژ به‌ركو گه‌له‌ك ژ وان پارچێن ئه‌ردی بۆ ئاكنجیێن گوندێن ده‌وروبه‌ر هاتینه به‌لاڤكرن، به‌لێ ژ به‌ر نه‌بوونا پرۆژێن خزمه‌تگۆزاری نه‌شیان ئاڤا بكه‌ن، ئه‌و ژی چاڤه‌رێی گه‌هاندنا پرۆژێن خزمه‌تگۆزاری بوون و گۆت: “پشتی گه‌هاندنا پرۆژێن خزمه‌تگۆزاری ئێكسه‌ر خودانێن وان دشێن سه‌ره‌دانا مه بكه‌ن و كاروبارێن خوه ب رێڤه ببه‌ن ئێكسه‌ر مۆله‌تا ئاڤاكرنێ دێ بۆ هێته‌دان”.
ناڤهاتی گۆتژی: “ئه‌م داخوازێ ژ خودانێن وان دكه‌ین، سه‌ره‌دانا سه‌رۆكاتیا باژێرڤانیا قه‌سرۆكێ بكه‌ن، داكو پارچێن وان ژێك بهێنه جوداكرن، ژ به‌ركو گه‌له‌ك ژ وان خودانان نزانن پارچا وانا ئه‌ردی ل كیڤه‌یه”.
