پڕۆژێن وه‌به‌رهێنانێ ل دووڤ پێدڤیا ده‌ڤه‌رێن پارێزگه‌ها دهۆكێ دێ هێنه بجهئینان
دهۆك، له‌زگین جوقی:
رێڤه‌به‌رێ گشتی یێ وه‌به‌رهێنانێ ل پارێزگه‌ها دهۆكێ دیار كر كو د پرۆفایلێ وه‌به‌رهێنانێ یێ پارێزگه‌ها دهۆكێ دا 378 پرۆژه‌یێن هه‌مه جۆرێن وه‌به‌رهێنانێ هاتینه پێشنیازكرن و دبێژیت: ئه‌و پرۆژه ل دووڤ پێدڤیا ده‌ڤه‌رداری و ناوچه‌داریێن سه‌ر ب پارێزگه‌هێ ڤه هاتینه به‌لاڤ كرن و دێ هێنه بجهئینان.
كوردو ئێحسان، رێڤه‌به‌رێ گشتی یێ وه‌به‌رهێنانێ ل پارێزگه‌ها دهۆكێ بۆ رۆژناما ئه‌ڤرۆ خویا كر كو ل هه‌موو ده‌ڤه‌رداریێن پارێزگه‌ها دهۆكێ دگه‌ل ئێدارا سه‌ربخوه یا زاخۆ پرۆژه‌یێن پێدڤی یێن وه‌به‌رهێنانێ هاتینه پێشنیازكرن و گۆت: “ئه‌ڤ پرۆژه‌یێن پێشنیازكری ل دووڤ پیدڤیاتیا هه‌موو ده‌ڤه‌رێن دهۆكێ هاتینه ئاماده‌كرن و ژلایێ ئیدارا پارێزگه‌ها دهۆكێ ڤه ژی هاتیه په‌سه‌ندكرن و د ده‌مه‌كێ نێزیك دا دێ هێنه دروستكرن”.
گۆتژی: “پرۆژه‌یێن چاندنێ و گه‌شت و گوزارێ و ئاڤه‌دانی و په‌روه‌ردێ و گه‌له‌ك جۆرێن دی یێن پرۆژه‌یێن وه‌به‌رهێنانێ د ناڤ پرۆفایلێ دهۆك و ئیدارا سه‌ربخوه یا زاخۆ و ئاكرێ و شێخان دا هه‌نه”.
رێڤه‌به‌رێ گشتی یێ وه‌به‌رهێنانێ ل پارێزگه‌ها دهۆكێ ئاشكرا ژی كر كو ئه‌ڤه ده‌مه‌كێ درێژ بوو وان كار ل سه‌ر به‌رهه‌ڤكرنا پرۆفایلێ وه‌به‌رهێنانێ بۆ پارێزگه‌ها دهۆكێ كار دكر و گۆت: “ل دووڤ وی پرۆفایلێ وه‌به‌رهێنانێ، پرۆژه‌یێن وه‌به‌رهێنانێ ل هه‌موو ده‌ڤه‌رداری و ناوچه‌داریێن پارێزگه‌ها دهۆكێ دێ هێنه ئه‌نجامدان”.
