ئیتالیا پشته‌ڤانیا ساخله‌میا پارێزگه‌ها دهۆكێ دكه‌ت
دهۆك، له‌زگین جوقی:
رێڤه‌به‌رێ گشتی یێ ساخله‌میا پارێزگه‌ها دهۆكێ دیار كر كو دوهی 15/11/2021ێ، قۆنسلێ گشتی یێ ئیتالیا ل هه‌ولێرێ ب مه‌ره‌ما ئاگه‌هداربوون ل سه‌ر ره‌وشا ئه‌نجامدانا پرۆژه‌یێن خزمه‌تگوزاری یێن ژلایێ رێكخراوێن ئیتالیا ڤه ل دهۆكێ هێنه بجهئینان، سه‌ره‌دانا ساخله‌میا پارێزگه‌ها دهۆكێ كر.
د. ئه‌فراسیاب موسا، رێڤه‌به‌رێ گشتی یێ ساخله‌میا پارێزگه‌ها دهۆكێ بۆ رۆژناما ئه‌ڤرۆ گۆت: “گرنگیا پرۆژه‌یێن وه‌لاتی ئیتالیا، ئه‌وێن ل ساخله‌میا دهۆكێ ئه‌نجام دده‌ن ئه‌وه كو هه‌ر ژ به‌رێ بنیاتی هه‌تا هه‌موو پرۆگرام ژی ژلایێ ئیتالیاڤه دهێته دانان ب هه‌ڤكاری دگه‌ل ساخله‌میا دهۆكێ، دیسا ئیتالیا شیایه ل نه‌خۆشخانا هیڤی یا زارۆكان خزمه‌ته‌كا مه‌زن بۆ زارۆكان ئه‌نجام بده‌ت، گوهورینێن باش د هه‌موو كه‌رتێ ساخله‌میێ دا ل پارێزگه‌ها دهۆكێ چێبووینه، ئه‌ڤه ژی بوویه ئه‌گه‌ر رێژا مرنێ گه‌له‌ك كێم ببیت ب تایبه‌ت ژی ل چاڤدێریا چر ل نه‌خۆشخانا هیڤی یا زارۆكان”.
ئاشكرا ژی كر كو به‌ری نوكه هنده‌ك حاله‌تێن زارۆكان هه‌بووینه ب پشته‌ڤانیا ئیتالیا و مه‌شقدانا نۆشدارێن دهۆكێ هاتینه چاره‌سه‌ركرن، ژ وانا ژی به‌ری نوكه سه‌نگا زارۆكه‌كێ نوو ژ دایكبووی 500 غرام بوون ل نه‌خۆشخانا هیڤی هاته چاره‌سه‌ركرن و ب ساخله‌میه‌كا باش ئه‌و زارۆ چوو مال، ئه‌ڤه ده‌ستكه‌فته‌كێ مه‌زنه بۆ نه‌خۆشخانه‌یێن دهۆكێ.
د. ئه‌فراسیاب موسا گۆت: “ئه‌ڤه چه‌ندین ساله ب رێیا رێكخراوا ئایسپۆ وه‌لاتێ ئیتالیا پرۆژه‌یێن ساخله‌میێ ل دهۆكێ بجه دئینیت و پشته‌ڤانیه‌كا مه‌زن ل ساخله‌میا دهۆكێ دكه‌ت، ئه‌م دخوازین ئیتالیا به‌رده‌وام پشته‌ڤانیا ساخله‌میا دهۆكێ بكه‌ت، پرۆژه‌یێن ساخله‌میێ یێن باشتر ل پاشه‌رۆژی ئه‌نجام بده‌ت، داكو خزمه‌تا خه‌لكێ دهۆك بهێَته كرن، هه‌روه‌سا ژی خزمه‌تا ئاواره و په‌نابه‌ران ژی پتر بهێته كرن”.
