سه‌رۆكێ حوكمه‌تێ پشته‌ڤانیێ ل كه‌رتێ ساخله‌میا زاخۆ دكه‌ت
زاخۆ، عه‌لی حاجی:
رێڤه‌به‌رێ ساخله‌میا ئیدارا سه‌ربخوه یا زاخۆ بۆ رۆژناما ئه‌ڤرۆ دیار كر، سه‌رۆكێ حوكمه‌تا هه‌رێما كوردستانێ ب گوژمێ ملیاره‌ك و 668 ملیۆن دیناران پشته‌ڤانیێ ل كه‌رتێ ساخله‌میا زاخۆ دكه‌ت و دبێژیت: نه‌خۆشخانه‌یه‌ك ل باتیفا دێ هێته ئاڤاكرن و ئه‌و بسپۆریێن كو پێدڤی ل زاخۆ دێ هێنه پڕكرن.
دكتۆر شاكر عه‌بدولره‌حمان، رێڤه‌به‌رێ ساخله‌میا ئیدارا سه‌ربخوه یا زاخۆ گۆت: “بودجه‌كا هه‌یڤانه ب گوژمێ 100 ملیۆن دیناران بۆ ساخله‌میا زاخۆ هاته ته‌رخانكرن، 252 ملیۆن دینار بۆ نووژه‌نكرنا نه‌خۆشخانا گشتییا بێدارێ ل زاخۆ و دابینكرنا كه‌لوپه‌لێن پێدڤی هاتنه ته‌رخانكرن، 266 ملیۆن دینار بۆ نووژه‌نكرنا نه‌خۆشخانا هه‌وارهاتنێ ل زاخۆ و دابینكرنا كه‌لوپه‌لێن پێدڤی بۆ وێ هاتنه ته‌رخانكرن، 238 ملیۆن دینار بۆ نووژه‌نكرنا نه‌خۆشخانا زارۆكبوونێ ل زاخۆ و دابینكرنا كه‌لوپه‌لێن پێدڤی هاتنه ته‌رخانكرن، دیسا 500 ملیۆن دینار بۆ نووژه‌نكرنا پێنج بنگه‌هێن ساخله‌میێ دگه‌ل دابینكرنا كه‌لوپه‌لێن پێدڤی بۆ وان بنگه‌هان هاتنه ته‌رخانكرن و 50 ملیۆن دینار بۆ نووژه‌نكرنا ڕێڤه‌به‌ریا گشتییا ساخله‌میا زاخۆ و دابینكرنا كه‌لوپه‌لێن پێدڤی هاتنه ته‌رخانكرن، 58 ملیۆن دینار بۆ نووژه‌نكرنا بنگه‌هێ ساخله‌میێ بارزان و دابینكرنا كه‌لوپه‌لێن پێدڤی، هاتنه ته‌رخانكرن و204 ملیۆن دینار ژی بۆ دانانا سیسته‌مێ ئای تی و كامیره‌یان بۆ هه‌موو نه‌خۆشخانه‌یان و دابینكرنا ترۆمبێله‌كا ته‌زاندنێ (براد) بۆ ده‌رمانان و شه‌ش ترۆمبێلێن هه‌وارهاتنێ هاتنه ته‌رخانكرن”.
گۆتژی: “ب هه‌ماهه‌نگی دگه‌ل رێڤه‌به‌ریا گشتی یا ساخله‌میا پارێزگه‌ها دهۆكێ دێ ئاریشه‌یا دكتۆرێن بسپۆر هێته چاره‌سه‌ر كرن، هنده‌ك ژ وان نۆشدارێن ل زاخۆ كار دكه‌ن دێ بۆ زاخۆ هێنه ڤه‌گوهاستن، دیسا هه‌ژماره‌كا دكتۆرێن دیتر كو نوكه ماسته‌رێ دخوینن، هه‌رده‌ما خواندنا خوه ب دووماهی ئینا دێ ل زاخۆ ده‌ست ب كار بن”.
دكتۆر شاكر عه‌بدولره‌حمان ل دووماهیێ گۆت: “نه‌خۆشخانه‌یه‌كا مودرن یا 40 ته‌ختی ل باتیفا دێ هێته ئاڤاكرن، دیسا بنگه‌هێ ساخله‌میێ ل ده‌ركارێ دێ هێته نووژه‌نكرن و چه‌ند بنگه‌هێن دیتر ژی ل ناحی و كۆمه‌لگه‌هێن زاخۆ دێ هێنه ئاڤاكرن و بنگه‌هه‌كێ تایبه‌ت بۆ نه‌خوشیێن دۆمدرێژ ل زاخۆ دێ هێته ڤه‌كرن”.
