سه‌رۆكێ ئوكرانیا: رۆسیا بزاڤا داگیركرنا ئوكرانیا دكه‌ت
سه‌رۆك كۆمارێ ئوكرانیا راگه‌هاند كو رۆسیا پتر ژ سه‌د هزار سه‌رباز و چه‌كێن گران ل سه‌ر سنۆرێ وه‌لاتێ وی كۆمكرینه و رۆسیا بزاڤا داگیركرنا ئوكرانیا دكه‌ت، ژ به‌ر هندێ ژی دڤێت وه‌لاتێن ئێكه‌تیا ئورۆپا و ب گشتی جڤاكێ نێڤده‌وله‌تی ل هه‌مبه‌ر بزاڤێن رۆسیا یێن بۆ داگیركرنا ئوكرانیا بێده‌نگ نه‌بن، چونكو ئه‌و یه‌ك دێ رێ بۆ شه‌ره‌كێ مه‌زن ڤه‌كه‌ت و ره‌نگه ببیته ئه‌گه‌ره‌كێ شه‌ره‌كێ نوو یێ جیهانی ژی.
ڤیلاده‌میر زیلینسكی ئه‌و یه‌ك ژی دیار كر كو به‌ری نها ئه‌مریكا و هنده‌ك ژ وه‌لاتێن ئێكه‌تیا ئورۆپا به‌حسێ هندێ كربوون كو رۆسیا دڤێت ئوكرانیا داگیر بكه‌ت، بزاڤێن ڤێ دووماهیێ یێن رۆسیا ژی نیشا دده‌ن كو براستی ژی نیه‌تا پوتینی گه‌له‌ك خرابه، دیاره رۆسیا ل دژی ئاشتیێ یه و مه به‌ری نها گه‌له‌ك جاران دیار كریه كو دڤێت پرسێن هه‌ی ب رێیێن ئاشتیانه بهێنه چاره‌سه‌ركرن، سه‌رۆكێ رۆسیا بخوه گه‌له‌ك جاران گۆتیه كو ئوكرانیا ل دژی ئاشتیێ یه، ئه‌ز ب باوه‌رم كو نها هه‌موو وه‌لاتێن جیهانێ ب چاڤێن خوه دیتن كا كێ ئاشتی دڤێت و كێ ل دژی ئاشتیێ یه، یێ سه‌د هزار سه‌رباز ل سه‌ر سنۆرێن مه كۆمكری دیاره وان ئاشتیێ نه‌ڤێت، چونكو بۆ هه‌ر كه‌سه‌كێ ئاشكرایه ب شه‌ری چو پرسه‌ك ناهێته چاره‌سه‌ركرن و رۆسیا ژی باش دزانیت هه‌ر شه‌ره‌ك روو بده‌ت دێ كارتێكرنا خوه ل هه‌موو ده‌ڤه‌رێ كه‌ت، ژ به‌ر هندێ ژی دڤێت جڤاكێ نێڤده‌وله‌تی ل هه‌مبه‌ر بزاڤێن رۆسیا یێن بۆ داگیركرنا ئوكرانیا بێده‌نگ نه‌مینن و دڤێت ده‌ست ب سزادانا رۆسیا بكه‌ن، چونكو براستی پێنگاڤێن نها یێن رۆسیا جهێ مه‌ترسیێ نه.
